Горнай улууһун Бэс Күөлүгэр сэттэ оҕолоох Диана уонна Леонид Федоровтар тэлгэһэлэрэ хаһаайыстыбаннай тутууларынан хайыы-үйэ туолан турар.
Ол курдук, саҥа дьиэлэрэ тутуллар кэмигэр улахан дьиэ кэргэн дьоһун аҕата Леонид Иванович табаарыстарын кытта икки буоксалаах гарааһы, баанньыгы, ампаары тутан кэбиспит. СӨ Тыатын хаһаайыстыбатын министиэристибэтин көҕүлээһининэн, Александр Артемьев салайааччылаах «Саха ынаҕа» ХЭУо исписэлиистэрэ 24 миэстэлээх хотону тутан биэрбиттэр. Онон улахан дьиэ кэргэн саҥа дьиэлэрэ үлэҕэ киирэн, хаһаайыстыбаларыгар аналлаах дьоҕус эбийиэктэр эмиэ тутулланнар, быйылгы кыстыгы эрэллээхтик көрсөр буолбуттар.
«100 кв. м иэннээх дьиэбитин бэркэ диэн тутан үмүрүттүлэр. Хаачыстыбалаахтык оҥордулар. Тэлгэһэбит иһигэр гараж, баанньык, апмаар тута сылдьан, хайдах-туох оҥороллорун көрө сырыттыбыт. Хотоммутун «Саха ынаҕа» ХЭУо исписэлиистэрэ тутан биэрдилэр. Онон ынахтарбыт аһаҕас халлаан анныгар хаалбат буоллулар. Отунан эмиэ хааччыйдылар. Холобур, 24 сүөһүнү кыстатарга, ортотунан, 45 туонна наада буоллаҕына, билигин хайыы-үйэ 15 туоннатын саҥа кыбыыбытыгар аҕалан сүөкээтилэр. Түгэнинэн туһанан, Ил Дархан Айсен Николаевка, СӨ Бырабыыталыстыбатын бэрэссэдээтэлин 1-кы солбуйааччы Владимир Бердниковка, тутааччыларга, Саха сирин олохтоохторугар ис сүрэхпититтэн итиитик-истиҥник махтанабыт. Дьонноох киһи тутайбат, ойуурдаах куобах охтубат диэн маны этэн эрдэхтэрэ», — диэн Диана уонна Леонид Федоровтар үөрүүлэрин үллэһиннилэр.
Андрей Сорокин хаартыскаҕа түһэриилэрэ (СИА)