Бэс ыйын 9-14 күннэригэр Казахстан Нурсултан куоратыгар диализтаах уонна уорганнара көһөрүллүбүт (трансплантированнай) спортсменнарга Национальнай спортивнай оонньуулар ыытылыннылар. Саха сирин хамаандата манна ситиһиилээхтик кыттан кэллэ.
Ол курдук, Григорий Кобяков харбааһыҥҥа 1-кы миэстэни, остуол тенниһигэр Туйаара Иванова 3-с миэстэни, Константин Семенов 3-с миэстэни, дартска 3-с миэстэни, Марианна Константинова 2-с миэстэни, ону тэҥэ, боулиҥҥа 3-с миэстэни, Маргарита Охлопкова дартска 2-с миэстэни ыллылар.
Кинилэри салайан илдьэ сылдьыбыт, өрөспүүбүлүкэтээҕи инбэлииттэр уопсастыбаларын диализниктар, трансплантированнай ыарыһахтар ячейкаларын бэрэссэдээтэлэ, Европа чөмпүйэнээтин призера Гаврил Чемоханов бу курдук кэпсээтэ:
—Спортивнай күрэхтэһии олус үрдүк таһымҥа ыытылынна. Ымпыгар-чымпыгар тиийэ барытын учуоттаабыттар этэ. Спортсменнар үксүлэрэ 1-кы, 2-с группалаах инбэлииттэр буоллахтара дии.
Урут атын киһи сүрэҕин олорторбут, Жанибек Успанов Финляндияҕа Европа чөмпүйэнээтигэр сылдьан, маннык күрэхтэһиини дойдутугар тэрийэргэ санаммыт эбит. Кини бэйэтинэн инбэлиит олоххо тардыһарыгар, доруобуйатын чөлүгэр түһэрэригэр спорт сүрүн көҕүлүүр күүс буоларын бэркэ билэр буоллаҕа. Ол иһин сүүрэн-көтөн, өйөбүл булан, 100-тэн тахса киһини кытыннарда. Казахстан чунуобунньуктара инбэлииттэри хайдах курдук өйүүллэрин көрөн сөхтүм.
Саха сиригэр эмиэ былаас уорганнарын бэрэстэбиитэллэрин кытары биир тылы булан, диализниктарга уонна трансплантированнай спортсменнарбытыгар бэйэбит Национальнай оонньууларбытын ыыппыт киһи диэн санааҕа кэллим.
Оттон бу бириистээх миэстэлэри ылбыт уонна ылбатах спортсменнары көрөн, мин испэр киэн туттабын: ыараханнык ыалдьа да сылдьан, ыарыыны кытта охсуһар уонна саҥа күүс-уох булан, күрэхтэһэр, дьону кытта билсэр, алтыһар, айанныыр, үөрэр-көтөр, олоххо тардыһар кыахтаахтарыттан. Маннык күрэхтэһии кинилэргэ элбэҕи биэрэр, күүстэригэр күүс эбэр, дьон тэҥинэн сылдьарга, уопсастыбаҕа туһалаах буоларга, чыпчааллары дабайарга, мэһэйдэри туоруурга, ыарыыны кыайарга эрэл кыымын саҕар.
Ангелина ВАСИЛЬЕВА, “Саха сирэ” хаһыат, edersaas.ru