(Эрэдээксийэ. Дьиҥнээх саха киирэр).
— Соргу дугуй!
— Дорообо! Хайа эһиги тиийэн кэллигит дуу? (Дьиҥнээх саха кэннин хайыһан көрөр).
— Суох, мин соҕотоҕун кэллим.
— Оттон эһигини этэбин ээ.
— Биһигини дуо? (эмиэ кэннин хайыһан көрөр). Кимнээҕи этэриҥ буолла? Мин соҕотоҕун кэллим.
— Ээ, чэ олоруҥ, туох наадаҕа кэллигит?
— Мин дуо?
— Оттон эһиги киирдигит дии, эһигини буолбакка, кими этиэхпиний? Олоруҥ диибин ээ.
— Соҕотохпун дии турдахха эһиги да, эһиги диэн кэлиилии кэбэ турдаҕай! Хайдах баҕайыный (ботугуруур)… Икки буолан көстөр буолан хааллым дуу? (Куттаммыт сирэйдээх кэннин хайыһан көрөр, онтон сиэркилэҕэ чугаһаан күлүгүн көрүнэр).
— Бэйэм эрэ эбиппин. Киһини куттаатыҥ дии, эһиги да, эһиги диэҥҥин, таксига наһаа сахсыллан бытарыйан хаалбыт муҥум дуу, дии санаатым ээ (олорор).
— Ыстатыйа аҕаллым, бэчээттиир инигит?
— Аҕалыҥ эрэ көрүөххэ.
— Биһиги дуо?… Мин дуу?.. (кэннин көрөр).
— Эһиги буолбакка? Эһиги эрэ баарга дылыгыт дии!
— Биһиги дуо? (кэннин көрөр)… Ээ, сөп… (сэрэнэн-сэрэнэн аргыый ыйытар). Бээрэ, эн биһигини хаспытын көрөҕүн ээ? Иккиэбит дуу, үһүөбүт дуу? Ээ…ээ… Эбэтэр өссө… (олус куттаммыт көрүҥнэнэр).
— Туох даа?! Хайдах буолбут киһигиний?!
— Һуу!… Хата инньэ диэ… КИҺИГИНИЙ диэ (үөрэр), киһини дэлби куттаатыҥ дии — эһиги да, эһиги диэҥҥин! Хас да буолан көстөр буолбуппун диэн дьиксинэн, уолуйан киирэн бардым, дэлби тириттим… (сүүһүн соттор). Аара былыргы өтөх аартыгынан айаннаан иһэн өбүгэлэрим моһуоктааннар бытарыйан хааллаҕым дуу, диэн санаан ыллым ээ.
— Дьэ муода киһи кэлбиккит.
— Кэл-бик-кин диэ (сибигинэйэр)…
— Чэ буоллун даҕаны, тыа киһитэ култуураны билбэт буолаахтаан биир эрэ ахсааҥҥа билинэн эрдэххит? «ЭН» дииһибин аны.
— Мин, мин, мин ээ бу соҕотохпун (үөрэр).
— Сөп. Бээ, ыстатыйаҕын ааҕыым. Олоро түһүҥ, ээ, олоро түс (ааҕар). Син бэрт ыстатыйа эбит, корректировкаланнаҕына, редакцияланнаҕына… Декабрь саҥатыгар таһаарыахпыт.
— Ол аата? Оттон ахсынньы саҥатыгар кыаллыбат дуо?
— Ол аата хаһан? Январьга дуо?
— Ахсынньыга диибин ээ.
— Туй сиэ! (толкуйдуур)… декабрь… декабрь… ээ, онтубут сахалыыта ахсынньы быһыылаах. Сөп ахсынньыга таһаарыахпыт. Саҥа хотон тутааһынын туһунан суруйбуккун дии…
— Эс тутааһынын да, хатааһынын да туһунан буолбатах, ТУТУУТУН туһунан суруйбутум.
— Сөп, сөп. Бээрэ ыстатыйаҥ аатын суруйбатаххын, “Хотон тутааһынын проблемата” диибит дуо?
— Хотон тутуута бытаарда — диэххэ.
— Бээрэ, ол бытаарааһына туохтан таҕыста?
— Бытаарыыта диэ…
— Эн манна миигин төрөөбүт тылынан саҥарааһыҥҥа үөрэтээһининэн дьарыктана кэлбитиҥ дуу тугуй?
— Хата дьарыктанааһынынан диэбэтиҥ дии! Оо, Ийэ тылым барахсаны сордуур эрэдээксийэ эбит ээ, арааһа…
— Барыҥ тахсыҥ! Киэр барыҥ! (улаханнык кыыһырар).
— Бардыбыыт, бардыбыт (соһуйан)… эмиэ бытарыйдыбыт, батыһыҥ бары, манна хаалымааҥ, хаалымаҥ…
Наталья МОРДОВСКАЯ-Уйан Кут.
Хартыына: detsad12.yaguo.ru