Ил Дархан Айсен Николаев дьаһалынан бу күннэргэ Дьокуускай куоракка “тотальнай дезинфекциялааһын” ыытыллар. Куорат хаһаайыстыбатын эксплуатацияҕа сулууспатын салайааччыта Айаал Егинов иһитиннэрбитинэн, болуоссаттары, уулуссалары дезинфекциялааһын өссө ыам ыйын 8 күнүттэн саҕаламмыт.
Коронавируһунан сибээстээн, ыам ыйын саҥатыттан болуоссаттары, уулуссалары, оҕо былаһааккаларын, элбэх кыбартыыралаах дьиэлэри дезинфекциялааһын саҕаламмыт.
“Бүгүн-сарсын паарка сабыылаах. Сарсыардаттан манна дезинфекцияны оҥордубут. Бүгүн түүн куорат 13 сүрүн уулуссатын, 6 болуоссаты дезинфекциялыыбыт. Ону таһынан, оптуобус тохтобулларын быыстала суох эмтиибит”, — диэн иһитиннэрдэ.
Айаал Анатольевич быһаарбытынан, дезинфекция икки көрүҥүнэн барар эбит. Бастатан туран, Роспотребнадзор ирдэбилинэн, сэрэтии үлэтин быһыытынынан подъездтарга тутуһар сирдэри, лифт кунуопкатын, буоcта дьааһыгын, о.д.а. миэстэлэри салайар (управляющай) хампаанньа тиһигин быспакка сууйар-сотор.
Иккиһинэн, толору дезинфекция. Бу коронавирус ыарыылаах олорбут дьиэлэрин биир даҕаны этээһин хаалларбакка толору (истиэнэтин, үрдүк муостатын) дезинфекцияланар.
Онон тустаах тэрилтэ куоракка дезинфекциялааһыны быыстала суох оҥорор.
Людмила ПОПОВА, «Саха сирэ» хаһыат, edersaas.ru