Десантниктар бырааһынньыктарын аһымал аахсыйанан бэлиэтээтилэр
Кэлиҥҥи сылларга Салгын десантниктарын күннэригэр Саха сириттэн араас сылларга сулууспалаабыт дьон анал аһымал аахсыйа оҥорон бэлиэтиир буоллулар.
Быйыл десантниктар эмиэ элбэх оҕолооох ыалларга уонна «Берегиня» Оҕо дьиэтигэр ас-үөл атыылаһан бэлэх оҥорон көмөлөстүлэр.
— Кэлиҥҥи кэмҥэ биһиги олоҕурбут туһата суох үгэстэр оннуларыгар аһымал аахсыйаны тэрийэргэ санаммыппыт. Төрөөбүт өрөспүүбүлүкэбитигэр, тапталлаах куораппытыгар өйгө-санааҕа хаалар, дьону үөрдэр бэлиэ түгэннэри оҥорорго дьулуспуппут.
Онон уокуруктар биэрбит аадырыстарынан биһиги көмөбүтүгэр наадыйар дьоҥҥо ас-үөл бэлэҕин оҥорон утары ууннубут.
Атын бойобуой чаастарга сулууспалаабыт дьон биһиги холобурбутун батыһалларыгар ыҥырабыт, — диэн аахсыйаны тэрийээччи Виктор Говоров СИА-ҕа санаатын үллэһиннэ.
Урукку сылларга атырдьах ыйыгар «фонтаҥҥа сөтүөлүүр» үгэстээх десантниктар бырааһынньыктарын дьон сэрэнэ-сэрбэнэ кэтэһэр эбит буоллахтарына, билигин сырдык санаа кыымын саҕар, үөрүүлээх түгэни бэлэхтиир үтүөкэннээх дьон бырааһынньыктарын элбэх оҕолоох дьон анаан күүтэр буоллулар.
Елена ПОТОЦКАЯ, «Cаха сирэ» хаһыат, edersaas.ru
Хаартыска СИА.