Дьокуускайга бүгүн Авиалесоохрана десантник-баһаарынайдарын Ханты-Мансийскай АУо уонна Тюмень уобалаһыгар атаарыы буолла.
Кинилэр 2,5 ый устатыгар Саха сирин оройуоннарыгар ойуур баһаардарын умуруорууга үлэлээтилэр. СӨ Бырабыыталыстыбатын уонна өрөспүүбүлүкэ олохтоохторун ааттарыттан ойуур баһаардарын умуруорууга көмөлөрүн иһин СӨ Экологияҕа, айылҕаны туһаныыга уонна ойуур хаһаайыстыбатыгар миниистири солбуйааччы Сергей Сивцев махтанна диэн СИА иһитиннэрэр.
Авиалесоохрана десантниктара үс ый кэриҥэ ойуур баһаардарын умуруорууга үлэлээтилэр, Саха сирин арҕаа, Бүлүү бөлөх уонна киин оройуоннарын, ол иһигэр Горнай, Уус Маайа улуустарыгар нэһилиэнньэлээх пууннары уоттан көмүскээтилэр.
СӨ Авиалесоохрана салайааччыта Владимир Леонов быйыл үлэ олус уустугун, өрөспүүбүлүкэҕэ дьон-сэргэ көмөлөһүүтэ улаханын бэлиэтээтэ.
«Олус улахан баһаардар буола сырыттылар, бэс ыйыгар ыксаллаах быһыы-майгы эрэсиимэ биллэриллибитэ. Күүс тиийбэт этэ, онон атын эрэгийиэннэртэн эбии күүстэри аҕалар туһунан быһаары ылыллыбыта. Уоту утары охсуһууга 19 эрэгийиэн кытынна. Атын эрэгийиэннэртэн авиабаһаарынай сулууспа 800-тэн тахса үлэһитэ көмөлөстө. Ханты-Мансийскайтан, Тюменьтан, Мурманскайтан, Хабаровскайтан саҕалаан, Архангельскайга тиийэ. Мин 35 сылтан ордук үлэлиибин, хаһан да маннык элбэх ахсааннаах киһи баһаарынай сулууспаттан, МЧС, Оборона министиэристибэтиттэн кыттыбыттарын, элбэх байыаннай, авиационнай тиэхиньикэлэр кыттыбыттарын өйдөөбөппүн», — диир Леонов.
СӨ бастакы вице-премьерэ Дмитрий Садовников, бырабыыталыстыба уонна өрөспүүбүлүкэ олохтоохторун ааттарыттан эрэгийиэннээҕи авиабааза үлэһиттэригэр, инструктордарга, десантник- баһаарынайдарга ойуур баһаардарын умуруорууга көмөлөрүн иһин СӨ Экологияҕа, айылҕаны туһаныыга уонна ойуур хаһаайыстыбатыгар миниистири солбуйааччы Сергей Сивцев махтанна уонна СӨ Бырабыыталыстыбатын махтал суруктарын туттарда.
Тюменьтан баһаарынай авиаотделение десантнига Денис Белкин СИА кэпсээбитинэн, маннык ыраах эрэгийиэҥҥэ аан бастаан командировкаламмыт. Баһаар туруутун кутталлаах кэмэ кини төрөөбүт дойдутугар муус устартан саҕаламмыт. Атырдьах ыйыгар уоту умуруора Бүлүү улууһугар кэлбит.
«Маннык эрэсиимҥэ үөрэммит буоламмыт, Саха сиригэр кэлэн баран улаханнык соһуйбатахпыт. Манна атырдьах ыйын 7 күнүгэр кэлбиппит. Ойуур баһаара буола турар сиригэр биир хонук айаннаан тиийбиппит. Тута үлэлээбитинэн барбыппыт. Уустук баһаардар, наһаа киэҥ сир умайбыт. Биһиги икки нэдиэлэни быһа сибээһэ суох ханна да тахсыбакка үлэлээтибит, наадалаахпытын эрэ спутнигынан быһаарсан. Олохтоох нэһилиэнньэ наһаа өйдүүр, туох кыалларынан көмөлөһө сатаатылар. Нэһилиэк баһылыга куруук кэлэн, аспытын-үөлбүтүн таһан сибээһи ыкса тутта», — диэн кэпсиир Белкин.
Ханты-Мансийскайтан кэлбит 34 киһилээх бөлөх от ыйын 5 күнүттэн Горнай улууһугар ойуур уотун утары охсуспута. Бу өрөспүүбүлүкэ үрдүнэн саамай ыарахан, уустук баһаар этэ. Итиэннэ Уус Маайа улууһугар турбут уот уустук быһыыны-майгыны үөскэппитэ.
«Саха сиригэр сайын курааннаата. Усулуобуйа ыарахан этэ. Күнүс — киһи тулуйбат куйааһа, оттон түүн — наһаа тымныы. Биһиги күһүҥҥэ диэри тутуллуохпут дии санаабатахпыт. Бары тапсан, сомоҕолоһон үлэлээтибит, дьаһалта көмөлөһө, тирэх буола турда, түүннэри-күнүстэри тиэхиньикэлэри, булдьозердары, массыыналары ыытан, туох наадалаахха барытыгар тута көмөлөһөн истэ», — диир СИА Ханты-Мансийскай АУо парашютнай баһаарынай сулууспа инструктора Андрей Михайлов. Кини олохтоохтор истиҥник көрсүбүттэригэр, көмө-тирэх буолбуттарыгар махтанна, ойуурдарын уоттан харыстыылларыгар ыҥырда.
Бүгүн десантник-баһаарынайдар эрэгийиэннэригэр көттүлэр.
Хаартыскалар: СИА
+1
+1
+1
+1
+1
+1
+1