Бу күһүн, алтынньыга, Ньурба улууһугар эдэр киһи итирэн баран, салгыҥҥа саанан ытыалаан, дьону куттаабыт этэ.
СӨ Борокуратууратын пресс-сулууспата иһитиннэрбитинэн, бу холуобунай дьыала суут мунньаҕар көрүллэн, бириигэбэр тахсыбыт.
Суут быһаарбытынан, бу дьыл алтынньы ыйыгар Ньурба улууһун Күндээдэ сэлиэнньэтин киинигэр 28 саастаах киһи арыгы иһэн баран, күлүгээнниир санааттан, «Вепрь КМ» бултуур карабинынан аҕыста салгыҥҥа ытыалаабыт.
Ол түмүгэр, уопсастыбаннай бэрээдэги куруубайдык кэспит, олохтоохтору куттаабыт, уу-нуурал олохторун уйгуурдубут.
Суут мунньаҕар сууттанааччы буруйун толору билиммит, кэмсиммит.
Судаарыстыбаннай буруйдааччы (борокуруор) туруорсуутун учуоттаан, суут кинини буруйдааҕынан билинэн, 2 сыл усулуобунай миэрэҕэ уурбут.
Бириигэбэр сокуоннай күүһүгэр киирэ илик.
Биһиги корр., «Саха сирэ» хаһыат, edersaas.ru
Хаартыска: интэриниэттэн.