2024 с. диэри Саха сирин бары Арктика оройуоннарын кииннэригэр оптоволокно тардыллыаҕа. Бу бырайыагы Арассыыйа сибээскэ министиэристибэтэ өйүүр. Бу туһунан СӨ инновацияҕа миниистирэ Анатолий Семенов отчуот кэмигэр кэпсээтэ.
«Былырыын түргэн интэриниэт утаҕар 70 саҥа нэһилиэнньэлээх пуунун холбообуппут. Ол аата барыта 362 пуун холбонно, 13 000 км оптоволокно тардылынна. Өрөспүүбүлүкэбит нэһилиэнньэтин 90 бырыһыана түргэн куйаар ситимигэр холбонор кыахтаах. 5 оройуон (Горнай, Чурапчы, Хаҥалас, Тааттар уонна Сунтаар) толору сыыппараҕа киирдэ. Билигин Өлөөнтөн Сааскылаахха диэри үлэ барар”, — диэтэ миниистир.
Манна даҕатан эттэххэ, «Морсвязьспутник» ФГУТ диэн тэрилтэ муора аннынан «Полярнай Экспресс» диэн утаҕы Тиксии бөһүөлэгэр 2024 с. диэри тардыахтаах.
Үс сыл иһигэр ВОЛС-ка барыта 1385 социальнай тэрилтэ холбоммут, ол иһигэр 434 үөрэх уонна 257 култуура тэрилтэлэрэ, 190 ФАП, 295 олохтоох бэйэни салайыныы уоргана, 166 баһаарыный чаас уонна пуун уо. д. а.
edersaas.ru