Бүгүн күнүс Усуйаанаҕа, Депутатскай бөһүөлэгин биир быыбардыыр учаастагар, болдьох иннинэ куоластаммыт бүллүтүөннэр угуллубут дьааһыктара эрдэ арыллыбытын туһунан көрдөрөр видеоматырыйаал батсаабынан тарҕаммыта.
edersaas.ru
Саха Өрөспүүбүлүкэтин Киин быыбардыыр хамыыһыйата ити матырыйаалы бэрэбиэркэлээбитэ маннык буолбут: Депутатскай бөһүөлэгэр Арктика микро-оройуонугар баар 617 №-дээх быыбардыыр учаастакка Тарыҥ Үрэх көмүс бириискэтин үлэһиттэрэ, 28 киһи, болдьох иннинэ быыбардаабыт бүллүтүөннээх дьааһыктарын хамыыһыйа, бары чилиэннэр уонна уопсастыбаннай кэтээн көрөөччүлэр көрөн турдахтарына, кырдьык арыйбыт итиэннэ стационарнай дьааһыкка укпут. Быыбар сокуонун быһыытынан ити – процедурнай кэһии диэн буолар. Ирдэбил быһыытынан, болдьох иннинэ куоластаммыт бүллүтүөннээх дьааһык быыбар бүппүтүн эрэ кэннэ, куоластары ааҕар саҕана, арыйыллыахтаах эбит.
Онон, Киин быыбардыыр хамыыһыйа күнүс 15 чааска мунньахтаан баран, Усуйаана улууһунааҕы территориальнай быыбардыыр хамыыһыйа бэрэссэдээтэлэ Исмайылов Шагелдыга уонна 617 №-дээх быыбардыыр учаастак хамыыһыйатын бэрэссэдээтэлэ Светленко Александрга сэрэтии оҥордо итиэннэ быыбары сокуон быһыытынан ыытарга, кэлэр өттүгэр болдьох иннинэ куоластаммыт бүллүтүөннээх дьааһыгы быыбар бүппүтүн кэннэ, куоластары ааҕыыга арыйарга эттэ. Оттон Тарыҥ Үрэххэ болдьох иннинэ куоластаммыт бүллүтүөннээх дьааһык хамыыһыйа чилиэннэрэ уонна кэтээн көрөөччүлэр баалларына арыллыбытын учуоттаан, итиннэ угуллубут 28 быыбардааччы бүллүтүөнүн дьиҥнээҕинэн ааҕарга быһаарда. Бу туһунан Саха Өрөспүүбүлүкэтин Киин быыбардыыр хамыыһыйатын бэрэссэдээтэлин солбуйааччы Иван Андросов иһитиннэрдэ.
Раиса СИБИРЯКОВА, “Саха сирэ”, edersaas.ru