Усуйаана улууһугар биир киһи коронавируска хаптарбыта бэҕэһээ биллэн, кинини кытары алтыспыт дьону быһаара сылдьаллар.
edersaas.ru
Ыалдыбыт киһи хантарааҕынан аармыйаҕа атын эрэгийиэҥҥэ сулууспалаабыт. Демобилизацияланан муус устар 27 күнүгэр Дьокуускайга кэлэн, изоляцияланыы эрэсиимигэр олорор туһунан дьаһалы туппут, COVID-19 дьаҥҥа анаалыс биэрбит. Ол эрээри, анаалыһын түмүгүн кэтэспэккэ, ыам ыйын 4 күнүгэр Депутатскайга көппүт.
Сарсыныгар анаалыһа мөлтөҕүн туһунан биллэрэннэр, билигин Депутатскайдааҕы инфекционнай стационарга киллэрилиннэ. Эдэр киһи Дьокуускайга биир дьиэҕэ олорбут доҕоро эмиэ коронавируска уорбаланна.
Ыарыһаҕы кытары алтыспыт дьон кэккэтигэр 53 киһи, биир сөмөлүөтүнэн көппүт дьон баар. Кинилэргэ барыларыгар изоляцияланыы эрэсиимин тутуһалларыгар дьаһал бэрилиннэ. Билиҥҥитэ анаалыһы 22 киһи, ыарыһаҕы кытары быһаччы алтыспыт дьон, туттардылар. Боруобалар Дьокускайга бэрэбиэркэҕэ ыытыллыахтара.
Депутатскайга уон куойкалаах обсерватор тэрилиннэ, миэстэтэ 40-50 куойкаҕа тиийэ элбэтиллиэн сөп. Улуус дьаһалтата стационары кэҥэтэргэ былаанныыр итиэннэ ИВЛ аппараатыгар эбии сайапка түһэрдэ диэн Ил Дархан уонна бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru
СИА хаартыската.