Казахстан фигуриһын Денис Тены өлөрүүгэ буруйдаахтартан биирдэстэрэ тутулунна. Бу туһунан бүгүн Алма Ата борокуратууратыгар иһитиннэрдилэр.
Бэҕэһээ, от ыйын 19 күнүгэр, биллиилээх спортсмены Алма Атаҕа быһаҕынан анньан өлөрдүлэр. Денис Тен кимнээхтэрэ биллибэт икки киһи кини массыынатыттан сиэркилэтин уоран уста турдахтарына түбэһэ кэлбит. Охсуһуу кэмигэр уоруйахтар эдэр киһини өттүгэр быһаҕынан аспыттар. Эмсэҕэлээччи үс лиитирэ кэриҥэ хаанын сүтэрбит, балыыһаҕа ыарахан туруктаах киллэриллибит. Эпэрээссийэ кэмигэр спортсмен тыына быстыбыт.
Денис 25 саастааҕа. Кини Сочитааҕы Олимпиадаҕа үрүҥ көмүс мэтээли ылары ситиспитэ, аан дойду үрүҥ көмүс (2013 с.) уонна боруонса призера (2015 с.) этэ. 2004-2010 сылларга Москваҕа Елена Буянова уонна Татьяна Тарасова салалталарынан эрчиллибитэ. Онтон АХШ көһөн, Фрэнк Кэрроллы кытта бииргэ үлэлии сылдьыбыта. Кэлин Николай Морозовка дьарыктаммыта.
Хаҥкыһыттар аан дойдутааҕы сойуустара Тен өлбүтүнэн кутурҕанын биллэрдэ. Елена Буянова Денис курдук талааннар спорка эрэ буолбакка, олоххо биирдиилээн эмэ көстөн ааһаллар диэтэ. Татьяна Тарасова фигурист өлүүтүн трагедиянан ааттаата. Евгений Плющенко, Ирина Роднина, Анна Погорилая, Евгений Ковтун уо. д.а. Денис чугас дьонугар дириҥ кутурҕаннарын тиэртилэр.
Роман ПОПОВ, «Саха сирэ» хаһыат, edersaas.ru
Хаартысклар: Интэриниэттэн ылылыннылар