Денис Савостин: “Сибиир” хаһаайыстыба сыахтарын саҥардан, эт оҥоруутун улаатыннарыаҕа”

Ааптар: 
Бөлөххө киир:

Саха сирин тыатын хаһаайыстыбатыгар быйыл хаһааҥҥытааҕар даҕаны  түргэнник ситэр салааны сайыннарыыга улахан болҕомто ууруллан эрэр. Чуолаан, сибиинньэни иитиигэ. Быйыл саас өрөспүүбүлүкэ Бырабыыталыстыбатын Бэрэссэдээтэлэ Андрей Тарасенко Хатастааҕы сибиинньэ комплексын үлэтин билсэн, саҥа соруктары туруорбута. Онтон аны Мархаҕа “Сибиир” ПТКХ хаһаайыстыбатын үлэтин көрдө-иһиттэ.  Дьокуускай куорат маҕаһыыннарыгар Саха сиригэр оҥоһуллар сибиинньэ этэ дэлэйэр чинчилэммит. Онуоха бу “Сибиир” хаһаайыстыба сыахтарын саҥардыы көмөлөһүөҕэ.  Бу туһунан Андрей Тарасенко  бэйэтин инстаграмыгар суруйда.

“Билигин аска-үөлгэ куттал суох буолуутун хааччыйыы хаһааҥҥытааҕар да суолталаах, өрөспүүбүлүкэ бэйэтин эт бородууксуйатынан хааччынарын туһугар. Маннык соругу өрөспүүбүлүкэ баһылыга Айсен Николаев туруорда, кини тыа хаһаайыстыбатын тэрилтэлэрин туруктаах үлэлэрин хааччыйарга сорудахтаабыта”, — диэбит Саха сирин Бырабыыталыстыбатын Бэрэссэдээтэлэ  Андрей Тарасенко @tarasenko_av бу хаһаайыстыбаҕа сыдьан баран.

Билигин “Сибиир” хаһаайыстыбаҕа 4 тыһыынчаттан тахса сибиинньэ иитиллэн турар.

Дьокуускай куоракка 4 №-дээх маҕаһыын ойоҕоһугар бэртээхэй, аныгылыы оҥоһуулаах, сахалыы орнаменнаах ас атыылыыр киосканы көрбүккүт буолуо. Манна “Сибиир” бородууксуйата атыыланар. Итиннэ эрэ буолуо дуо, атын туочукаларга эмиэ – ол иһигэр “Бааһынай ырыынагар” тиийэ.  Былырыыҥҥыттан хаһаайыстыба бородууксуйата “Мархинское “диэн брендинэн тахса турар.

— Билэргит курдук, Мархаҕа сибиинньэ иитиитинэн Владимир Кабохин 26 сыл дьарыктаммыта. Аҕа кынным бу аан дойдуга бүрүүкээбит ковид ыарыыттан доруобуйата айгыраан, олохтон туораабытын кэннэ кини тэрийбит, атаҕар туруорбут, сайыннарбыт хаһаайыстыбатын эспэт туһуттан мин уонна улахан кыыһа Лена Владимировна буоламмыт салгыы тутан хаалбыппыт. Онон билигин хаһаайыстыбабыт Владимир Филиппович Кабохин аатынан “Сибиир” хаһаайыстыбата дэнэр. Онон Дьокуускайга кэлэммин сыл устата хаһаайыстыбам үлэтин-хамнаһын үөрэппитим, өрөспүүбүлүкэ төһө эккэ наадыйарын билбитим. Ол кэниттэн бу сыл кулун тутар ыйыгар тэрилтэбитин уонна оҥорон таһаарыыбытын саҥардыы стратегиятын ылыммыппыт. Онон аҥаардас сибиинньэни иитинэн эрэ буолбакка, оҥорон таһаарыыны улаатыннарар соругу туроурбуппут. Ол курдук, биэс сыл устата эти оҥорууну 10 төгүл улаатыннарыахтаахпыт. Ол эбэтэр ити 1-кы нүөмэрдээх сорукпутунан буолар. Искусственнай буоһатыыга саҥа куорпуһу үлэҕэ киллэриэхтээхпит. Сибиинньэлэри көрүүгэ-истиигэ, аһатыыга автоматизация ситимин күүскэ туһаныахтаахпыт. Кыылларбыт турар усулуобуйалара ирдэбилгэ эппиэттиир буолуохтаах. Сибиинньэ буойуна-сыаҕын тутан, үлэҕэ киллэриэхтээхпит.   Билигин 9 төбөттөн 60-диэри астыыр буоллубут. Ону тэҥэ атыылыыр табаарбыт эгэлгэтин элбэтиэхтээхпит. Полуфабрикат араас көрүҥүн оҥоруохтаахпыт. Быһата, киэҥ хабааннаах бырайыакка ылыстыбыт, онон Мархаҕа оҥоһуллар бородууксуйа сыыйа Арассыыйа киэҥ ырыынагар тахсарын ситиһиэхпит. Уонна, биллэн турар, ис ырыынагы толору хааччыйарга кыһаныахпыт, — диэн кэпсээтэ Денис Анатольевич.

Онон өрөспүүбүлүкэ Бырабыыталыстыбатын Бэрэссэдээтэлэ Андрей Тарасенко эппитин курдук, өрөспүүбүлүкэ бэйэтин этинэн-аһынан толору хааччынарыгар “Сибиир” курдук хаһаайыстыбалар өҥөлөрө улахан буолуоҕа.

Бэлэмнээтэ Женни Стрюкова
Хаартыска: М.Васильева СИА) түһэриитэ

+1
0
+1
0
+1
0
+1
0
+1
0
+1
0
+1
0