Ыччат бырабыыталыстыбатын салайбыт Денис Белозеров СӨ бырабыыталыстыбатын бэрэссэдээтэлин солбуйааччынан ананна. Бүгүн Ил Түмэн пленарнай мунньаҕар дьокутааттар кини кандидатуратын өйөөтүлэр.
Денис Георгиевич вице-премьер э.т. быйыл бэс ыйыгар анаммыта. Ол иннинэ кини Экономика миниистиринэн үлэлии олорбута. Экономист уонна юрист идэлээх. Ил Дархан Айсен Николаев кини кандидатуратын дьокутааттарга билсиһиннэрэригэр, үп, тыа хаһаайыстыбатын, ас-үөл эйгэлэригэр үлэлээн балай да уопутурбутун, эппиэтинэстээх салайааччы быһыытынан үүнэн-сайдан тахсыбытын бэлиэтээтэ. Денис Белозеров бу дуоһунаска олорон тыа хаһаайыстыбатынан, арктика, хотугу улуустар боппуруостарынан дьарыктаныаҕа.
Ыспыраапка:
Белозеров Денис Георгиевич
1996-2001 сс. – Тыа хаһаайыстыбатын академиятын устудьуона;
2001-2003 сс. – Үп министиэристибэтигэр сүрүннүүр исписэлиис;
2003-2009 сс. – “Туймаада” ФАПК отдел начальнига;
2009-2014 сс. – Тыа хаһаайыстыбатын министиэристибэтигэр департамент салайааччыта, миниистири солбуйааччы;
2014-2018 сс. – Дьокуускайдааҕы килиэби астыыр кэмбинээт генеральнай дириэктэрэ;
2018 с. кулун тутартан – Экономика миниистирэ;
2018 с. бэс ыйыттан – СӨ бырабыыталыстыбатын бэрэссэдээтэлин солбуйааччы.
Аграфена КУЗЬМИНА, edersaas.ru