Ил Дархан Айсен Николаев 1187 №-дээх «Саха Өрөспүбүлүкэтин Баһылыгын правовой акталарыгар кэккэ уларытыылары киллэрэр туһунан» ыйаахха илии баттаабыта.
edersaas.ru
Бу ыйаах быһыытынан, коронавирус дьаҥын бохсорго ылыллыбыт хааччахтыыр дьаһаллар бүгүҥҥү күнтэн түһүмэхтэринэн сымнатыллаллар. Ол туһунан Бырабыыталыстыба Бэрэссэдээтэлин солбуйааччы Денис Белозеров маннык быһаарар:
– Хааччахтыыр дьаһаллар түөрт бөлөҕүнэн араарыллыбыттара. Киинтэн ыраах сытар, саас-сайын суоллара быстар улуустарга хааччахтар үгүстэрэ уһулуннулар. Култуура, спорт эйгэлэрин, банкетнай саалалар үлэлэрэ көҥүллэннэ, онуоха мустар киһи ахсаана 50-тан элбэх буолуо суохтаах.
Таатта, Амма, Чурапчы, Үөһээ Бүлүү уо.д.а. улуустар киирэр бөлөхтөрүгэр эргиэн тэрилтэлэрэ, ырыынактар үлэлииллэрэ көҥүллэнэр, ол эрээри үлэһиттэр маасканы уонна бэрчээккини кэтэллэрэ ирдэнэр. Нэһилиэнньэҕэ өҥөнү оҥоруунан дьарыктанар тэрилтэлэр: парикмахерскайдар, косметика салоннара эрдэттэн суруттарыы быһыытынан, дьону муспакка, үлэлииллэрэ көҥүллэнэр.
Дьокуускайга, Жатайга, Аллараа Бэстээххэ, Тиксиигэ, Покровскайга, Нерюнгрига, Мииринэйгэ уонна Ленскэйгэ бэйэни изоляцияланыы эрэсиимэ ыам ыйын 31 күнүгэр диэри уһатылынна. Ол гынан баран, иис тэрилтэлэрэ, химчисткалар уонна килийиэни кытта алтыһыыта суох өҥөнү оҥорор тэрилтэлэр үлэлииллэрэ көҥүлэннэ. Нэһилиэнньэ сибиэһэй салгыҥҥа тахсан, сөптөөх ырааҕы тутуһан, физкультуранан уонна спордунан дьарыктанар, таһырдьа дьаарбайар кыахтанна.
Ити эрээри, төһө даҕаны сымнатыы киллэрилиннэр, өрөспүүбүлүкэ бары олохтоохторо, туох ханнык иннинэ эргиэн уонна өҥөнү оҥорор эйгэ үлэһиттэрэ, сэрэнэр дьаһаллары кытаанахтык тутуһаллара ирдэнэр. Хомойуох иһин, маҕаһыын аайы атыыһыттар уонна хассыырдар бары мааскалаах, бэрчээккилээх турар буолбатахтар. Атыылаһааччылар эмиэ көмүскэнэр тэриллэри туттуох тустаахтар. Өрөспүүбүлүкэ олохтоохторугар чэгиэн-чэбдик доруобуйаны итиэннэ дьаҥтан сэрэнэр дьаһаллары барытын тутуһалларыгар баҕарабын. Хааччахтыыр дьаһаллары устуу тус бэйэбититтэн тутулуктааҕын өссө төгүл өйдүөҕүҥ.
Раиса Сибирякова, «Саха сирэ» хаһыат, edersaas.ru