Буолаары турар дьиэтээҕи чөмпүйэнээккэ саха кикбоксердарыттан биир эрэлбит Денис Андреев 67 кг ыйааһыҥҥа кыттыахтаах. Кини бу сылларга номнуо бэйэтин үрдүк кылаастаах спортсменынан биллэрдэ. Дьэ эрэ, Арассыыйа үс төгүллээх чөмпүйүөнэ, Европа уонна аан дойду Кубогын кыайыылааҕа дьиэтээҕи чөмпүйэнээккэ бэлэмин туһунан билиэххэ.
— Денис, бастатан туран, бэйэн тускунан кэпсээ. Хаһааҥҥыттан кикбоксинынан дьарыктанан саҕалаабыккыный?
— Кыра эрдэхпиттэн аҕам успуорка такайара. Бастаан көҥүл тустууга биэриэн баҕарара. Ол эрээри, Маҕаҥҥа дзюдо эрэ сиэксийэтэ баара. Онон, бастаан, дзюдонан дьарыктанан иһэн, алтыс кылааска буоксаҕа көспүтүм. Ол дьарыктана сырыттахпына, убайым Дьокуускайга «Эллэй Боотурга» муай-тай сиэксийэтэ баар диэн эппитэ. Онно баран суруйтарбытым, олох да кикбоксинг эбит. 2007-2008 сылларга илиҥҥи охсуһуу көрүҥнэрэ сайдан аҕай турар кэмнэрэ этэ.
— Онтон кикбоксиҥҥа көстөҕүҥ дии? Бу көрүҥҥэ ордук тугун биһирээтиҥ?
— Оннук. Маҕантан Дьокуускайга диэри дьарыкпар биир чаас кэриҥэ айаннаан кэлэр этим. Кикбоксины туораттан көрдөххө, көннөрү охсуһуу эрэ курдук да, олус кырасыабай, эрчимнээх. Мин майгыбар сөп түбэһэр курдук. Уонна ордук охсуулаах-тэбиилээх көрүҥү сөбүлүүр эбиппин.
— Кикбоксинг буоксаттан уратыта тугуй?
— Боростуойдук эттэххэ, кикбоксиҥҥа атаҕынан охсор көҥүллэнэр. Ону таһынан, бу көрүҥ быдан түргэн хамсаныылаах. Иккилии мүнүүтэ үс раунд киирсэбит. Ол быыһыгар биир мүнүүтэ сынньанабыт. Кикбоксинг сүрүн үс көрүҥҥэ арахсар: лоукик (тобугунан тэбии, саайыы көҥүллэммэт), фулл-контакт (илиинэн, атаҕынан саайар уонна тэбэр көҥүллэнэр, ол эрээри тобук эмиэ көҥүллэммэт), К-1 диэн көрүҥҥэ эргийиилээх саайыылар, тэбиилэр көҥүллэнэллэр.
Буоксаттан уратыбыт диэн, шлемнаах, атахпытыгар көмүскэллээх уонна атах сыгынньах киирсэбит.
— Бэлэмҥин хайдах сыаналыыгын?
— Бу күрэхтэһиигэ анаан сыл устата бэлэмнэннибит. Москваҕа, Кавказка, Ингушетияҕа дьарыктаммыппыт. Билигин «Триумфка» баарбыт. “Кыһыл көмүһү” ылар кыах баар. Бэлэмим этэҥҥэ түмүктэнэн эрэр, бэйэм туругум үчүгэй. Рингэ көрдөрүөҕэ.
— Утарсааччыларгын билэҕин дуо?
— Билэн буоллаҕа. Ааттаах-суоллаах уолаттар кэлиэхтээхтэр. Өр сылларга Арассыыйаҕа кыайа сылдьыбыт, билигин маҥнайгы нүөмэринэн сылдьар уол – сүрүн утарсааччым.
— Тус олоҕуҥ туһунан кэпсиэҥ дуо?
— Кэргэннээхпин, икки кыыс оҕолоохпун. Росгвардияҕа үлэлиибин. Үлэбэр өйүүллэр, дьарыктанарбар бириэмэ биэрэллэр. Дьиэ кэргэним эмиэ өйүүр-өйдүүр. Ыйааһыммын тутарбар, кэргэним сөптөөх аһылыгы астыыр. Бурдук аһы, минньигэһи сиэбэппин. Ол оннугар эт аһылыгы, оҕуруот астарын сиибин.
— Денис, биир нэдиэлэнэн буолаары турар күрэхтэһиигэ ситиһиилэри баҕарабын!
Денис Андреев, балаҕан ыйын 19 күнүгэр 1994 сыллаахха төрөөбүт
Кэргэннээх, икки оҕолоох.
Зодиак: дева
Гороскоп: ыт
Сөбүлүүр бүлүүдэтэ: итальянскай куухуна
Истиҥ баҕа санаата: Билиҥҥи кэмҥэ Арассыыйа чөмпүйүөнэ
Сөбүлүүр киинэтэ: «Начало» (режиссер Кристофер Нолан)
Сөбүлүүр кинигэтэ: «Бойцовский клуб» Чак Паланик
Виктория Бястинова, edersaas.ru, «Саха сирэ» хаһыат.
Хаартыскалар Денис Андреев архыыбыттан.