Маны аах Нацбырайыактар Сүрүн

Өлүөхүмэ саҥа уһуйааннаныа

«Демография» национальнай бырайыагынан Өлүөхүмэ саҥа уһуйааннаныа. Бу туһунан СӨ Тутуу министиэристибэтин пресс-сулууспата иһитиннэрдэ.

Өлүөхүмэ куоратыгар Миллер аатынан уулусса 23/3 №-гэр тутулла турар уһуйаан быйыл ахсынньыга бүтэн үлэҕэ киириэ. Бу «Демография» национальнай бырайыак иитинэн тутуллар.
Саҥа уһуйаан 240 миэстэлээх буолар. Үс мэндиэмэннээх таас дьиэҕэ  хас биирдиилэригэр сүүрбэлии кырачаан сылдьар 4 кыра, 4 орто, 4 улахан оҕолорго аналлаах бөлөхтөр тэриллэллэр. Бастакы  мэндиэмэҥҥэ кыра оҕолор бөлөхтөрө, хаһаайыстыбаннай хос, туспа киирэр ааннаах пищеблок былааннаналлар. Арыый обургулар бөлөхтөрө иккис мэндиэмэҥҥэ баар буолар. Манна мэдиссиинэ, үлэһиттэр хосторо, музыка саалата тэриллэллэр. Онтон үһүс мэндиэмэҥҥэ улахаттар бөлөхтөрө, административнай, гимнастикалыыр хостор, компьютернай кылаас киирэллэр. Сүрүн аан уонна дьааһыла икки бөлөҕө төрөппүттэр кырачааннарын салаасканан, кэлээскэнэн аҕалалларыгар табыгастаах буоларыгар пандустанар.
Генеральнай бэдэрээччит «Монтажник» ПК  бастакы, иккис мэндиэмэннэри бүтэрэн үһүскэ таҕыста. Бастакыга тутааччылар истиэнэтин оҥороллор.
Өрөспүүбүлүкэҕэ 2021 сылга «Демография» национальнай бырайыак уонна «Развитие образования в Республике Саха (Якутия) на 2020 — 2024 годы и на плановый период до 2026 года» судаарыстыба бырагырааматынан 1155 миэстэлээх 8 уһуйаан (итинтэн 400 миэстэ дьааһыла саастаахтарга) тутуллуо. Өрөспүүбүлүкэҕэ 2020 сылга уһуйааны тутуу уонна атыылаһыы суотугар оскуола ининнээҕи саастаах оҕолорго  639 миэстэ тэриллибитэ. Итинтэн 239 миэстэ — үһүгэр диэри саастаах оҕолор бөлөхтөрүгэр.
0
0