Дьокуускайга Кузьмин уулуссатын 25 №-гэр 240 оҕо сылдьар уһуйаана тутулла турар.
Тутууну ыытарга хантараак «Эрдэм» ХЭУо кытта 2020 сыллаахха от ыйыгар түһэрсиллибитэ, үлэни сакаастаачы «СӨ судаарыстыбаннай сакаас сулууспата» ГКУ, оттон СӨ судаарыстыбаннай тутууну уонна дьиэни хонтуруоллуур управление үлэ толоруллуутун хонтуруоллуур.
Бүгүҥҥү күҥҥэ иһинээҕи инженернэй ситим үлэтэ түкүтэнэн эрэр. Сыбааччылар биригээдэлэрэ дьиэни ситэрэр-тупсарар, үлэһиттэр уһуйаан сирин-уотун тупсараллар, оонньуур былаһаакканы монтажтыыллар, күрүөтүн-хаһаатын оҥороллор. Эбийиэк 78% бэлэм.
3 165,63 кв. м иэннээх үс мэндиэмэннээх уһуйаан бырайыагынан 12 бөлөх сылдьарыгар аналлаах саадка физкултуура саалата, таҥас сууйар хос, күүлэйдиир веранда, лиип уо.д.а. былааннаналлар.
Бастакы мэндиэмэҥҥэ 2-4 саастаах кырачааннар сылдьар бөлөхтөрө (4), иккискэ — биэһигэр диэри саастаах оҕолор сылдьар бөлөхтөрө (4), үһүскэ сэттэтигэр диэри саастаах оҕолор бөлөхтөрө (4) киириэхтээхтэр. Бу туһунан СӨ Тутуу министиэристибэтин пресс-сулууспата иһитиннэрэр.
+1
+1
+1
+1
+1
+1
+1