«Демография» бырайыагынан 6,8 миллиард көрүлүннэ

Бөлөххө киир:

Демография” национальнай бырайыак чэрчитинэн, 2021 сылга 6,8 миллиард солкуобай көрүллүөҕэ. Ол, былырыыҥҥыны кытары тэҥнээтэххэ, 1,4 миллиард солкуобайынан элбэх. Ол туһунан социальнай сайдыы, үлэ миниистирэ Елена Волкова иһитиннэрэр.

Национальнай бырайыак биэс эрэгийиэннээҕи бырайыактартан турар. Быйыл 5 миллиард солкуобай кэриҥэ үп оҕолоох ыаллары өйүүргэ анаммыт. Ол былырыыҥҥытааҕар 1,4 төгүл элбэх. Манна 16 тыһыынча дьиэ кэргэн хабыллыаҕа.

Үс сааһын туола илик оҕолору үөрэтиигэ, уһуйаанынан хааччыйыыга болҕомто ууруллар. Ол сыалга 1,1 миллиард солкуобай көрүллэн, Өлүөхүмэҕэ, Алдаҥҥа, Аммаҕа, Намҥа, Тааттаҕа, Уус Алдаҥҥа, Дьокуускайга 8 оҕо саада тутуллуоҕа.

«Аҕам саастаах көлүөнэ” бырайыагынан Бүлүү улууһун Сосновкатыгар 150 миэстэлээх Бүлүүтээҕи психоневрологическай интэринээт-дьиэ куорпуһа тутуллан бүтэн эрэр, Өлүөхүмэҕэ 200 миэстэлээх кырдьаҕастары-инбэлииттэри хааччыйар киин дьиэтэ тутулла турар. Аҕам саастаах дьоҥҥо пневмококковай инфекцияны утары быһыыны биэриигэ 456 мөлүйүөн солкуобай көрүлүннэ.

Абыйга, Аллайыахаҕа, Үөһээ Халымаҕа, Ленскэйгэ, Мииринэйгэ, Намҥа, Аллараа Халымаҕа, Нерюнгригэ, Мэҥэ Хаҥаласка, Хаҥаласка, Эбээн Бытантайга доруобуйаны бөҕөргөтүү уопсастыбаннай бырагыраамалара үлэлиэхтэрэ.

Ангелина Васильева, “Саха сирэ” хаһыат, edersaas.ru

Хаартыска: sakha.gov.ru

+1
0
+1
0
+1
0
+1
0
+1
0
+1
0
+1
0