Бэс ыйын 23-24 күннэригэр Дьокуускайга «Демографическое развитие Дальнего Востока и Арктики» диэн VII Бүтүн Арассыыйатааҕы кэмпириэнсийэ буолуоҕа. Манна Уһук Илин уонна Арктика кыһалҕаларын, сытыы боппуруостарын быһаарсыахтара.
Кэмпириэнсийэ чэрчитинэн, пленарнай мунньах, 6 панельнай сессия, социальнай эйгэ тэрилтэлэрин салайааччыларыгар туспа сессиялар буолаллара былааннанар.
Ону тэҥэ, социальнай хантырааҕы туһаммыт дьон – норуот маастардарын быыстапкалара буолуоҕа. Уһук Хоту тыйыс усулуобуйатыгар үлэлииргэ харыстанар ньымалары көрдөрөр былаһаакка үлэлиэҕэ. Кэмпириэнсийэ ыалдьыттара социальнай эбийиэктэргэ сылдьыахтара.
— Кэмпириэнсийэ чэрчитинэн, дьиэ кэргэн уонна демографическай бэлиитикэ боппуруостара, дьиэ кэргэн сыаннастарын бөҕөргөтүү, төрөөһүнү элбэтии, үлэһит дьон доруобуйатын харыстааһын, өлүү ахсаанын аҕыйатыы, уһун үйэлэниини, сааһыран баран, көхтөөх буолууну көҕүлээһин, о.д.а. боппуруостар көрүллүөхтэрэ. Кырдьаҕас, кыаммат дьону, инбэлииттэри көрүүгэ-истиигэ саҥа технологиялары киллэрии туһунан туспа кэпсэтиэхпит.
Икки күннээх тэрээһиҥҥэ барыта 150 киһи кыттара, ол иһигэр, атын эрэгийиэннэртэн, федеральнай киинтэн 70-ча ыалдьыт кэлэрэ күүтүллэр, — диэн СӨ үлэҕэ, социальнай сайдыыга миниистирэ Елена Волкова кэпсээтэ.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru.