РФ бэрэсидьиэнэ Владимир Путин биэнсийэҕэ тахсар сааһы уһатыы туһунан сокуон барылыгар уларытыылары киллэрбитин тула, дьон-сэргэ элбэхтик кэпсэтэр, ырытар.
Матвей Лыткин, «Трезвая Якутия» уопсастыбаннай хамсааһын лиидэрэ:
— Үлэлиир саастаах дьон ахсаана тоҕо аҕыйаан иһэрий? Эр дьон сүрэх-тымыр ыарыыларыттан өлөллөрө, дьахталлары кытары тэҥнээтэххэ, үс төгүл элбэх. Кинилэр арыгыны иһиилэрэ дьахталлардааҕар эмиэ үс бүк элбэх. Мантан сиэттэрэн, буор иһээччи, инбэлиит буолуулара, ыал арахсыыта, тулаайах элбээһинэ, араас ыарыылаах оҕолор төрөөһүннэрэ, уо.д.а. — бу барыта судаарыстыба моонньугар сүктэриллэр. Арыгыттан сылтаан эрдэ суорума суоллланыыларын этэ да барбаккын.
90-с сылларга арыгыны иһии муҥутаан элбии сылдьыбыт кэмигэр (биир киһиэхэ 20 л тиксэрэ) “демографическай дьаама” диэн үөскээбитэ, нэһилиэнньэ ахсаана аҕыйаабыта.
Онон биэнсийэҕэ тахсар сааһы үрдэтии – күһэллэн ылыллыбыт миэрэ дии саныыбын. Биэнсийэ реформата – нэһилиэнньэ арыгыга ылларбытын биир содула. Үлэлиир саастаах дьон арыгыны испэттэрэ буоллар, элбэх нолуок төлөнөр, иккиһинэн, элбэх социальнай кыһалҕа суох буолуо этэ.
Ыарахан усулуобуйаҕа олорор, үлэлиир дьоҥҥо судаарыстыбаттан көмө курдук анал усулуобуйа баар буолуохтаах. Ол иһин РФ бэрэсидьиэнэ Владимир Путин норуокка утары баран, араас чэпчэтиилэри олохтоото. Холобур, аҕыйах ахсааннаах хотугу норуоттар бэрэстэбиитэллэрэ, элбэх оҕолоох ийэлэр биэнсийэҕэ эрдэ тахсыылара, тыа сиригэр олорор дьоҥҥо биэнсийэлэрэ эбиллиитэ, о.д.а. Ол эрээри, арыгыны утары охсуһар бэлиитикэ судаарыстыба таһымыгар ыытыллыахтаах, оччоҕо эрэ демография, нэһилиэнньэ доруобуйата чөлүгэр түһүөҕэ.
Кэпсэттэ Ангелина Васильева.