XV Дьахталлар сийиэстэрин уонна II Уһук Илиннээҕи дьахталлар пуорумнарын дэлэгээттэрэ «Саха сирин дьахталлара – элбэх оҕолоох дьиэ кэргэттэргэ” аһымал ахсыйаны биллэрдилэр. Бу аахсыйа кулун тутар ыйы быһа ыытыллыаҕа.
Билигин өрөспүүбүлүкэҕэ 31 тыһыынчаттан тахса элбэх оҕолоох дьиэ кэргэттэр олороллор. Бу аахсыйа көмөтүн сүрүннээн социальнай өйөбүлгэ олус наадыйар дьиэ кэргэттэр тутуохтара.
Ханнык баҕарар нэһилиэккэ дьахтар сэбиэтэ уопсастыбаннай олоҕу хамсатар, саҥаны киллэрэр, дьоҥҥо көмөлөһөр күүс буолар. Актыбыыс дьахталлар социальнай суолталаах бырайыактары үлэлэтэллэр, араас аахсыйалары, тэрээһиннэри ыыталлар. Онон сийиэс чэрчитинэн, маннык аһымал аахсыйа элбэх оҕолоох ыаллар кыһалҕаларыгар болҕомто уурулларыгар, оҕолор култуурунай, спортивнай, сынньанар-аралдьыйар дьарыктарын кэҥэтэргэ туһуланар.
Бу аахсыйаны үлэ, социальнай сайдыы министиэристибэтин өйөбүлүнэн, Саха сирин дьахталларын түмсүүлэрин сойууһа тэрийэн ыытар.
Ангелина Васильева, “Саха сирэ” хаһыат, edersaas.ru