Сэтинньи 25 күнүгэр бүттүүн Саха сирин үрдүнэн, үгэс быһыытынан, Олоҥхо күнүн бэлиэтиэхпит. Онон, бу күнтэн саҕалаан, сэтинньи 25-ахсынньы 5 күннэригэр өрөспүүбүлүкэҕэ Олоҥхо декадата биллэриллэр.
edersaas.ru
Улуу убайбыт Былатыан Ойуунускай үбүлүөйдээх төрөөбүт күнүттэн сиэттэрэн, өрөспүүбүлүкэ улуустара – олоҥхо, оһуохай биһиктэрэ, быйылгы Олоҥхо декадатын хаһааҥҥытааҕар даҕаны көхтөөхтүк, хайыы-үйэҕэ саҕалаатылар.
Ол курдук, холобур, Олоҥхо ассоциациятын Чурапчытааҕы салаатын салайааччыта Мария Герасимова иһитиннэрэринэн, талааннаах олоҥхоһуттардаах Чакыр нэһилиэгин олохтоохторо декаданы Ыалга олоҥхолооһунунан астылар.
— Чакыр “Сарыал” түөлбэтин олохтоохторо Николай Иванович Максимов дьиэтигэр Аня Макарова, Елена Сивцева, “Хатыҥнаах” түөлбэҕэ Роман Тарасович Кузьминнаах дьиэлэригэр Валентина Адамова уонна кини сиэнэ Христина Адамова, “Алгыс” түөлбэҕэ Сергей Яковлевич Макаров дьиэтигэр Сайаана Попова, Татьяна Адамова, оттон “Сардаҥа” түөлбэҕэ Василий Иванович Сидоров дьиэтигэр, быйыл Алдаҥҥа Олоҥхо ыһыаҕар Кылаан бириис хаһаайына буолбут чулуу олоҥхоһуппут Николай Григорьев олоҥхолорун астына-дуоһуйа иһиттилэр.
Өссө ити күн чакырдар «Эбэ» күөлүн муҥхалаан, көмүс хатырыктааҕынан күндүлэттилэр. Онон, саха ыалларыгар чахчы даҕаны Олоҥхо дьоро киэһэтэ буолла!, — диир Мария Андреевна.
Манна даҕатан эттэххэ, бу «Ыалга олоҥхолооһун» бырайыак Дьокуускайдааҕы «Арчы Дьиэтин» көҕүлээһининэн саҕаламмыта. Бырайыак ааптара — фольклор исписэлииһэ, алгысчыт Борис Михайлов-Айылҕан.
Ити курдук, “Ыалга олоҥхолооһун” кэрэхсэбиллээх бырайыак үтүө үгэс быһыытынан улуус-улуус, нэһилиэк-нэһилиэк аайы киэҥник тарҕанан эрэрэ олус үчүгэй.
Татьяна МАРКОВА, edersaas.ru
Сүрүн хаартыскаҕа: Улуус киинигэр Чурапчыга, «Айылгы» Култуура, духуобунас дыбарыаһыгар Олоҥхо декадатын саҕалыыр Алгыска бэлэмнэнии кэмигэр.