Саха сиригэр Ил Дархан Егор Борисов ыйааҕынан, балаҕан ыйын иккис бээтинсэтэ үһүс сылын Чөл олоҕу тарҕатар күнүнэн биллэриллэр. Бу сылга ол балаҕан ыйын 8 күнүгэр түбэһэр. Сүрүн тэрээһиннэр балаҕан ыйын 4-13 күннэригэр ыытыллаллар. edersaas.ru
Декада чэрчитинэн, киин куоракка хас күн аайы чөл олоххо сыһыаннаах тэрээһиннэр ыытылла тураллар. Бары үөрэх кыһаларыгар, үлэ кэлэктииптэригэр чэбдик олоххо ыҥырар доруобуйа уруоктара, сэминээрдэр, көрсүһүүлэр, лиэксийэлэр, быыстапкалар, спортивнай күрэхтэһиилэр, кэмпириэнсийэлэр буолаллар. «Трезвая Якутия» уонна «Якутия против алкоголизма» уопсастыбаннай хамсааһыннар үлэ кэлэктииптэригэр тиийэн лиэксийэлэри ааҕаллар. Ону тэҥэ “Общее дело” Бүтүн Арассыыйатааҕы уопсастыбаннай түмсүү уһулбут арыгы, табах буортутун туһунан киинэни көрдөрүөхтэрэ. Бу киинэ олохтоох тэлэбиидэнньэҕэ эмиэ көстүөхтээх.
Арыгыттан тутулуктаах буолбут дьоҥҥо уонна кинилэр аймахтарыгар наркологическай диспансерга, анал кабинеттарга аһаҕас аан күннэрэ ыытыллаллар, “Эрэнии төлөпүөнэ” үлэлиир.
Уулуссаларга, болуоссаттарга спортивнай күрэхтэһиилэр, аралдьытар тэрээһиннэр, маассабай оонньуулар, хаалыгынан хаамааччылар флеш-мобтара, үҥкүү уонна уруһуй куонкурустара буолуохтара.
Бүгүн, балаҕан ыйын 8 күнүгэр, профессор Георгий Башарин бюһугар сибэкки дьөрбөтүн уурдулар. Күнүс үс чааска Орджоникидзе болуоссатыгар чөл олох быыстапка-дьаарбаҥката, оҕолорго, ыччакка аналлаах оонньуулар ыытыллыахтара. Кыайыылаахтарга бириис быһыытынан роликтары, балааккалары, үрүксээктэри, о.д.а. чэбдик олоххо сирдиир спортивнай, туристическай маллары түҥэтэлиэхтэрэ.
Декада ХИФУ 1 кууруһун устудьуоннарыгар анаммыт “Угловскай ааҕыыларынан” түмүктэниэҕэ.
ХИФУ устудьуоннарыгар арыгы, табах буортутун туһунан лиэксийэ ааҕаллар.
2013 сылтан өрөспүүбүлүкэҕэ арыгыны утары бэлиитикэ күүскэ ыытыллар. Бу сылга диэри маҕаһыыннарга арыгы көстүүлээх миэстэҕэ атыылана турбут буоллаҕына, билигин арыгыны атыылыыр маҕаһыын балтараа тыһыынчаттан 800-кэ тиийэ аччаата, ону сэргэ арыгыны иһии 13 % аҕыйаата диэн экспертэр бэлиэтииллэр. 146 нэһилиэк арыгыттан олоччу аккаастанна, 18-тан 25-гэр диэри испэт ыччат ахсаана 10 төгүл элбээтэ.
Арыгыны утары бэлиитикэ сүрүннээн ыччаты аһыы утахтан тэйитэр тускуллаах. Ол да буоллар, билигин даҕаны наркология диспансерыгар күннэтэ 10 киһи эмтэнэ киирэр, үксэ орто уонна аҕа саастаахтар.
Арассыыйаҕа арыгыны утары охсуһарга Саха сирэ үчүгэй көрдөрүүлээх регионнар истэригэр киирдэ, оннооҕор экспердэр уопут ыла кэлэр буоллулар. Ол да буоллар, дойду үрдүнэн уопсай хартыына билигин даҕаны уустук. Онон маннык үлэ тохтообокко, тиһигин быспатаҕына, аны уонча сылынан түмүктээх үлэ көстүөҕэ диэн эрэннэрэллэр.
Ангелина Васильева, “Саха сирэ” хаһыат, edersaas.ru