Үөдэйгэ эдэр «ньыгыллар» элбэх оҕолоох ыалларга бэлэх ууннулар
Ньурба улууһун Үөдэй нэһилиэгин «Биир ньыгыл Арассыыйа» баартыйа чилиэннэрэ элбэх оҕолоох ыалларга Саҥа дьыллааҕы бэлэҕи оҥордулар.
edersaas.ru
Бу дьоҥҥо олус туһалаах үтүө дьыала туһунан нэһилиэк баһылыга Мария Николаева маннык кэпсиир:
— Ол курдук, сэттэ ыал «Үтүө санаа харыйата» аахсыйа чэрчитинэн минньигэс бэлэҕи туттулар. Биэс оҕолоох Ивановтарга, Григорьевтарга, Нестеровичтарга уонна үс оҕолоох Крыловтарга, Акимовтарга, Григорьевтарга, Ларионовтарга, Андреевтарга фрукта арааһа Саҥа дьыллааҕы бырааһынньыктааҕы остуолларыгар мааны аһынан буолуоҕа.
Баартыйа эдэр чилиэннэрэ Василий, Марфа Федоровтар, ону тэҥэ түөрт оҕотун атахтарыгар туруортаан, үөрэхтээн, олохторун суолун тэлэн биэрбит ыал ийэтэ Люция Пермякова, кулууп дириэктэрэ Надежда Аммосова уонна олохтоох баартыйа салайааччыта Мария Николаева өрүү үөрүүнү бэлэхтии сылдьар дьон. Кинилэр араас тэрээһиннэргэ көхтөөхтүк кытталлар.
Үтүө санаа киһини үрдүккэ көтүтэр. Эдэр элбэх оҕолоох ыалларга кэлэр сылга үчүгэйи, ситиһиини баҕарабыт. Барыта этэҥҥэ эрэ буоллун!
Елена ПОТОЦКАЯ, «Саха сирэ» хаһыат, edersaas.ru