Ньурба улууһун Үөдэй нэһилиэгин моой отчуттара быйыл окко хаһааҥҥытааҕар да эрдэ киирдилэр.
edersaas.ru
Оттооһун нэһилиэккэ үгэннээн турар кэмэ. Бу туһунан нэһилиэк баһылыга Мария Николаева сиһилии кэпсиир:
— Нэһилиэкпитигэр быйылгы былаан — 1030 тонна от. Ону толорорго бары кыах баар.
Отчуттар былааннарын толоро охсоору, сибиэһэй салгынынан да тыына түһээри, ходуһаны биир гына толордулар.
Бастакынан Василий Федоров Буут сайылыгар хотуурун түһэрбитэ ыраатта. Ол курдук, от ыйын 2 күнүгэр нэһилиэккэ бастакы хотуур тыаһын лыҥкынаппыта. Былырыын ити сиртэн 9 түгэх буоллаҕына, быйыл 6 эрэ түгэх кээһиилээхтэр.
Сааскыттан биир да таммах самыыр түспэккэ, үрдүк сирдэр курааннаан, от үүнүүтэ биллэ мөлтөх.
Онон «от суох» диэн олорбокко, туох сэрбэйэри барытын охсон, үлэ күөстүү оргуйар.
Эрдэһит отчуттар Юрий Николаев, Леонид Гаврильев 4-түү түгэхтээхтэр, Николай Ли — 1, Корниловтар — 2 түгэхтээхтэр. Нэһилиэккэ биир эрэ бааһынай хаһаайыстыба баар.
Онон моой отчут, кими да кэтэспэккэ, оттууругар анаан бэйэтэ эрдэттэн уматык, саппаас чаас булан бэлэмнэнэр үгэстээх. Ынах сүөһү да, сылгы да — барыта кэтэх.
Окко түһэр былаан барыларыгар тарҕанар. Кэтэх хаһаайыстыбалаах хас биирдии ыал төһө оту оттообутун чуолкайдык билэр сыалтан, күн аайы эппиэттээх үлэһит сибидиэнньэ хомуйан, сурукка тиһэр.
Онтон кэлин дьаһалта үлэһиттэрэ массыынанан сылдьан барытын көрөллөр-истэллэр. Онон сыыппара от бүтүүтэ чуолкайданар.
Кэрэхсэбиллээҕэ баар, тыа ыала оҕолорун илдьэ сылдьан, бэрт кыраларыттан үлэҕэ үөрэтэллэр.
Тыа сирин оҕолоро өбүгэ саҕаттан бу курдук дьоммутун батыһа сылдьан, от үлэтигэр үөрэннэхпит дии.
Билигин нэһилиэк ходуһаларыгар 53 тиэхиньикэ, 42 киһи тэринэн күргүөмнээхтик үлэлии сылдьаллар.
Билиҥҥи туругунан 40 тонна от кэбиһилиннэ.
Елена ПОТОЦКАЯ, «Саха сирэ» хаһыат, edersaas.ru
Хаартыска: нэһилиэк баһылыга Мария Николаева тиксэриитэ.