Сорох дьону Арассыыйаҕа хаһаайыстыбаннай табаарынан хааччыллыы боппуруоһа долгутар буолла. Сомпууну, мыыланы, бороһуогу уонна да араас суунар-тараанар табаары киэҥник тарҕатааччы Эмиэрикэ бөдөҥ Prokter & Gamble хампаанньа аны Арассыыйаҕа биисинэһин тохтоторго санаммыт үһү. Сорох дьон таҥас сууйар бороһуогу, мыыланы, сомпууну хаһаана аҕай сылдьаллар үһү диэн сурах-садьык иһиллэр. Ол иһин чугастааҕы хаһаайыстыбаннай “Ганза” маҕаһыыҥҥа тахсан барбах сыананы тэҥнээтим, табаар төһө дэлэйин чуҥнаатым.
Үстүү эрээтинэн турар улахан долбуурдарга табаар арааһа кырыы-кырыытынан анньыллан турар. Ким да хаһаайыстыбаннай табаар хаһаана сылдьара көстүбэт. Кураанах долбуур аҥайбыта эмиэ суохха дылы. Сыана да наһаа уларыйбатах курдук. Хаартыскаҕа түһэрэрбин дьиктиргээн Кристина диэн бейджиккэ аата сурулла сылдьар атыыһыт кыыс кэлэн туохха наадыйарбын сураста. Онуоха мин утары бэйэтиттэн ыйытаах буоллум.
– Procter & Gamble хампаанньа үлэтин тохтоторунан дьон хаһаайыстыбаннай табаары хаһаанан эрэллэр үһү дии, эһиэхэ атыыгыт саппааһа хайдаҕый, дьон ордук тугу атыылаһар буолла?
— Маҕаһыыммытыгар көрөрүҥ курдук табаар билиҥҥитэ толору. Арай Kerasus диэн кэриэйэ сампууна уонна Zewa туалетнай кумааҕыны кытта Loreal косметиката хамаҕатык бу күннэргэ атыыланна, — диэтэ атыыһыт.
— Американскай хампаанньа табаара маҕаһыыҥҥытыгар бүттэҕинэ? – диэччи буоллум.
— Бүттэҕинэ бүттүн, бэйэбит дойдубут оҥорон таһаарар бородууксуйата элбэх дии..
— Кырдьа5астарга, бастайааннай атыылаһааччыларга чэпчэтиилээххит дуо?
— Баарын курдук баар. Куруук атыылаһар дьоммут чэпчэтиилээх каартанан туһаналлар. Ону сэргэ, маҕаһыыммытыгар атыылаһыллыбыт чиэктэринэн сотору-сотору араас лотереялар оонньотооччубут.
Дьон санаата
Настя Алексеева:
— Биһиги дьиэ кэргэн ити сааҥсыйаттан улаханнык эмсэҕэлээбэппит. Тоҕо диэтэххэ, «Тайд», «Ариель» бороһуоктарынан таҥас сууммат буолбуппут хаһыс да сыла. «Ушастый нянь» диэн бэйэбит дойдубут бороһуогунан, «Жемчуг» паастанан тиис сууммуппут ыраатта. Ити омук суунар тэриллэрэ киһи тириитин ардыгар кыһытар, үчүгэйдик сайҕаабатахха, бааһырдар да кутталлаахтар.
Валентина Петровна, 57 саастаах:
— Баҕар эдэрдэр омук табаардарын суохтуохтара. Тус бэйэм омук табаарыгар улаханнык кыһаммаппын. «Чистая линия» сомпууну туттабын. Мин көрдөхпүнэ, ити омук сомпууннара, суунар тэриллэрэ барыта биир иһиттэн ылан тус-туспа хааҕа кутуллубут курдуктар. Гелин да сомпуунун, да киһи араарбат.
Ульяна ЗАХАРОВА, «Саха сирэ» хаһыат