Бу икки атын-атын улуустарга буолбут уонна атын-атын ыстатыйаларынан көрүллүбүт дьыалалар эрээри, маарыннаһар өрүттээхтэр, ол — буруйдаахтар быһаҕынан дьону эчэтэн баран, көҥүлгэ хаалыылара.
Бастакы дьыала батсаабынан тарҕана сылдьыбытын өйдүүбүн: бу дьыл кулун тутар ыйын саҥатыгар Мэҥэ Хаҥалас улууһугар (Аллараа Бэстээххэ этэ, быһыыта) суол кытыытыгар турар кафелартан биирдэстэригэр онно үлэлиир кыыһы урукку эрэ буолуохсут күнүүлээтэҕэ аатыран, быһаҕынан хаста да анньан, өлөрө сыспыта. Кыыһы кафеҕа баар дьон быыһаабыттар этэ.
Суут мунньаҕар ити барыта дакаастаммыт, суут кинини РФ Холуобунай кодексатын икки ыстатыйатынан — быһаҕы туттан киһи доруобуйатыгар орто эмсэҕэлээһини оҥоруу уонна өлөрөрүнэн сааныы иһин — буруйдааҕынан билиммит.
Уонна накаастабыл миэрэ быһыытынан, 3 сылга көҥүлүн быһары усулуобунайынан ааҕан, 3 сылга тургутар болдьоххо уурбут. Итиэннэ сууттанааччы эмсэҕэлээччигэ моральнай уонна материальнай хоромньу төлүөхтээх.
Бириигэбэр сокуоннай күүһүгэр киирэ илик, өрүттэр ааһыныахтарын сөп.
Иккис дьыала: Үөһээ Бүлүүттэн төрүттээх К. диэн киһи Дьокуускайтан Амма Болугуругар быстах үлэлии тиийэн баран, итирик сылдьан, билбэт ыалыгар киирбит. Уонна бу саастаах дьону туох да сылтаҕа суох кырбаабыт, өссө кыраабылы уонна быһаҕы тутта-тутта.
Холуобунай дьыала бу урдуска «күлүгээннээн, предмети туттан, доруобуйаҕа чэпчэки эмсэҕэлээһини оҥоруу» диэн ыстатыйанан тэриллэн, суукка көрүллүбүт.
Суут кинини 300 чаас булгуччулаах үлэҕэ уонна моральнай хоромньуну төлүүргэ уурбут. Бириигэбэр сокуоннай күүһүгэр киирбит.
Бу туһунан СӨ Борокуратууратын пресс-сулууспата иһитиннэрдэ.
Сахалыы судургутук санаан көрдөххө, иэдээн дии — киһини быһаҕынан үлтү кэйгэллээн баран, эмсэҕэлээччитэ тыыннаах ордубутун эрэ иһин көҥүлгэ хаалларыы диэн! Оттон бу киһийдэх арыгы иһэн баран, сэнээбитин ситэри «сии» тиийбэтигэр эрэл баар дуо? Ким ону мэктиэлиирий?!
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн