Ырыаһыт, соторутааҕыта “Народная миссис Россия-Мира” ааты ылбыт Дарья Лаврова саҥа альбомун уонна “Куттаныма” килиибин сүрэхтээтэ.
“Мацури” эрэстэрээн дьоҕус саалатыгар Дарья клиби оҥорорго көмөлөспүт дьонун мунньан, саҥа килиибин сүрэхтээтэ уонна бэйэтин бэкээринэтин аһынан күндүлээтэ. Ыалдьыттар ордук сып-сылаас, сымнаҕас плюшкалары кэрэхсээтилэр. Бу плюшкаларын Иннокентий Тарбахов ырыссыабынан оҥорбут. Ынах арыытын, мүөтүн харыһыйбакка кутар буолан, бурдук ас хачыгырас, минньигэс уонна эбээ аһын санатар. Darya Bakerу бэкээринэ бородууксуйата элбэҕэ суох эрээри, дьиэтээҕи ас курдук минньигэс, ол иһин дьон хамаҕатык атыылаһар. Даша ийэтэ биэкэр буолан, эмиэ астыырын олус сөбүлүүр. Пандемия кэмигэр үп-харчы киллэрээри, бэкээринэ арыйбыт эбит.
— Плюшкаларбын, булочкаларбын сөбүлүүрүм бэрт буолан, куонкуруска бэлэмнэнэрбэр уустук этэ, — диэн кини кэпсиир. — Ол да буоллар, купальниктаах кыттарбар, дьууппа кэппэтэҕим.
Бу күрэскэ кэрэ сэбэрэни, быһыыны-таһааны, уһун атаҕы эрэ көрөллөр диэн сымыйа эбит. Бүтүн Арассыыйаны көрдөрөр кыахтаах, кэргэннээх, оҕолордоох кэрэ дьахтар бу олоххо бэйэтин миэстэтин булбут, дьоҕурдаах, дьарыктаах, күүстээх уонна үтүө санаалаах буолуохтаах. Ол иһин кыбыстыыны кыайбыппын, атын кыргыттары кытары биир тылы чэпчэкитик булбуппун, үөрэ-көтө, астына сылдьарбын, 5 киһи иһигэр киирсэн финалга ыллаабыппын барытын учуоттаабыттар этэ. Төттөрүтүн, хартыыҥкаттан түспүт курдук уһун-көнө, мин аҕай дэммит тоҥ кырасаабыссалар аакка-суолга тиксибэтэхтэриттэн бэйэлэрэ да соһуйбуттара.
Маннык куонкуруска кыттыахтарын баҕарар ийэлэргэ туһаайан этиэм этэ – саамай сүрүнэ, хайаан да модель буолуохтааххын диэн буолбатах, ис санааҥ, ис сүрэххиттэн кыттар баҕаҥ, туох сыаллааҕыҥ, бэйэҕин хайдах арыйарыҥ ол суолталаах эбит. Мин элбэҕи арыйдым, сайдарга, инники барарга күүс-уох ыллым, бэйэбин өссө ордук таптаатым диэххэ сөп. Онон аан дойдутааҕы күрэскэ барарга бэлэммин, өссө элбэх көрсүһүүлэр, саҥа арыйыылар күүтэллэр.
“Туохтан да куттаммакка, инниҥ диэки баран ис!”
Дарья тула, чахчы, сырдык эниэргийэ тыга сылдьар курдук. Кини кими баҕарар кытта биир тылы булар, кэпсиир-ипсиир, күлэр-үөрэр, сэргэхситэр, чахчы да, “норуодунай” киһи. Килиип сүрэхтэниитигэр кини джаз ырыалары ыллаата, устар бөлөҕү билиһиннэрдэ. “Куттаныма” диэн ааттаах клиби Seiko айар түмсүү бу сайын 4 күн устата устубут. Элбэх киһи кыттыгастаах: үҥкүүһүттэр, стилистэр, визажистар, режиссердар, оператордар… Бары буор-босхо көмөлөспүттэр.
Бу килиипкэ Дарья хас да уобараһы арыйан көрдөрөр. Ырыынак атыыһыта, түбүккэ баттаппыт дьиэ хаһаайката уонна ыра санаатын толорон, ыллыы-туойа, үҥкүүлүү сылдьар ырыаһыт кыыс… Онон ырыа сүрүн санаата – баҕа санааларгын олоххо киллэрэртэн куттаныма, инниҥ хоту баран ис диэн ис хоһоонноох.
Интэриэһинэйэ диэн, килиипкэ блогердар аныгылыы киирсиилэрэ – челлендж көстөн ааһар. Ол эбэтэр, Дарья Лаврова блогер Вова Дормидонтовка, ырыаһыттар Варя Максимаҕа уонна Эрхааҥҥа тургутугу ыытар. Кини ыйыытынан, араас дьээбэлээх сорудахтары толороллор. Холобур, уулуссанан баран иһэн, ыллаан киирэн бараллар, дьону уунан ыһаллар, сөбүлүүр былааччыйаларын быһыта кырыйаллар, харахтарын симэн олорон кырааскаланаллар, о.д.а. Ол курдук клип көрдөөх, дьээбэлээх уонна чэпчэки тыыннаах.
Дарья килиип таҥыллан тахсыбытын аан бастаан көрөр буолан, саҥа аллайа, сороҕор күлэ олордо. Түмүккэ, килиип табыллыбытын, сайыҥҥы чаҕылхай күннэри санаппытын бэлиэтээн туран, устар бөлөххө махтанна.
Килииби көрүҥ:
https://www.instagram.com/p/CEY_m8MooxS/
Ангелина Васильева, “Саха сирэ” хаһыат, edersaas.ru
Ааптар хаартыскаҕа түһэриилэрэ.