Дьаҥ туран, олохпут укулаатын биллэ уларытта. Инстаграмҥа ырыаһыт Дарья Лаврова астаабыт аһын таһааран, элбэх лайк хомуйар. Мин кинини талааннаах ырыаһыт быһыытынан билэбин.
Оттон бу соторутааҕыта буулка оҥорон атыылыыр буолбутун истэн бараммын, испэр наһаа хайгыы санаабытым. Талааннаах ырыаһыт, үс оҕо иһирэх ийэтэ бу туһунан бүгүн биһиги хаһыаппытыгар маннык кэпсээтэ:
КОФЕ УОННА БУУЛКА
— Уу чуумпуга итии кофены иһэ-иһэ, сымнаҕас минньигэс буулканы сиир наһаа үчүгэй… Мин оҕо эрдэхпиттэн бурдук аһы сөбүлүүбүн. Ийэм биэкэр буолан, тиэстэҕэ улааппыт оҕобун диэххэ сөп. Онон астыыртан толлубаппын. Буулкаларым оруобуна ийэм астыыр үлүннэриилээх тиэстэтиттэн оҥоһуллубут курдуктар. Ийэм килиэп буһарар симиэнэтин дьон кэтэһэрин өйдүүбүн. Ол иһин кини туйаҕын хатаран, буулка астаан саҕалаабыппынан киэн туттабын.
2015 сыллаахха улахан кыыспын оҕолонон баран, бэйэм буулка астыыр сыах арыйарым дуу диэн санаа кэлбитэ. Дьиэ иһигэр астыыр кыра оҕолоох киһиэхэ уустуктары үөскэппитэ. Бурдугу мэһийии, күннэтэ ип-итии оһоххо астааһын… Ол иһин ити санаабын хаалларан кэбиспитим.
КУҺАҔАН АРДЫГАР ҮЧҮГЭЙДЭЭХ
Хааччахтааһын кэмэ буолбутугар “вокальнай фитнес” диэнинэн харчылаһан олорбутум. Онтон үөрэхпин төлүүр наада буолбута. Били урукку ыра санаам ымыыта син биир ханна эрэ сүрэҕим түгэҕэр сөҥө сылдьыбыта. Харчыласпыт, тугу эрэ оҥорбут киһи диэн санааттан, эмискэ бу санаам күүһүрэн, тиллэн кэлбитэ. Онтон быйыл, куһаҕан үчүгэйдээх диэбиккэ дылы, эмискэ дьаҥ туран, иллэҥ кэммэр киһи олоҕор сыһыаннаах араас марафоннары көрөн, оҕо эрдэҕинээҕи баҕа санаабын олоххо киллэрэр санаабын күүһүрпүт эбиппин. Бу кэмҥэ оруобуна дьүөгэм олус интэриэһинэй этии көтөхпүтэ, хата, ону ылынан, бу муус устар 28 күнүгэр бастакы буулкаларбын астаабытым. Тастан үлэһитим суох, барытын бэйэм оҥоробун, мэһийэбин уонна буһарабын. Буулка сыаҕын арыйаары гынарбын истэн, ийэм барахсан наһаа үөрбүтэ. «Киһи наһаа сылайар, илистэр үлэтэ эрээри, кытаат, сатаннын эрэ” диэн алҕаабыта. Бастакы сакааһы доҕотторум, аймахтарым биэрбиттэрэ. Омуммутугар нэдиэлэни быһа күүстээх үлэ буолбута. Билигин дьэ, сааһыланан, күннээҕи эрэсииминэн үлэлиибин. Күн аайы саҥаттан саҥаны астыыбын. Бэҕэһээҥҥи буулка эҥин диэн суох. Барыта сибиэһэй. Буулкам икки көрүҥ тиэстэттэн оҥоһуллар. Минньигэс уонна уойуон баҕарбат дьоҥҥо туспа, анал бурдуктан оҥоһуллубут баар. Тиэстэтин оҥорон баран кэтэһэбин, онтон суулаан баран, хаттаан тахсарын күүтэбин. Тиэстэ киһи санаатын, настарыанньатын билэр. Онон өрүү үөрэ-көтө, ыллыы-ыллыы, үчүгэй настарыанньалаах астыыбын.
Бэйэ дьыалатын арыныан баҕарар дьоҥҥо тугу сүбэлиэмий, улахан урбаанньыт буолбатахпын. Бириэмэ көрдөрүөҕэ. Улаатан, кэҥээн бардахпытына, баҕар, сүбэлиэм. Билигин кыра хоһу куортамнаан астыыбын. Киһини таптыыр дьарык кынаттыыр дии саныыбын. Онон дьону үтүктүбэккэ, сүрэххит туохха сытарынан ылсан дьарыктаныҥ диэн сүбэлиэм этэ.
Ульяна Захарова, «Саха сирэ» хаһыат, edersaas.ru