Сайтпытыгар бу дьыл бэс ыйын 20 күнүгэр «Сөтүө кэмэ саҕаланна. Сэрэҕи умнумаҥ!» диэн матырыйаалым бэчээттэммитэ. Онно сөтүө кэмэ саҥа саҕаламмытын, оттон оҕо ууга былдьаныытын номнуо үс түбэлтэтэ тахсыбытын, ууга сэрэхтээх буоларга тугу билэр наадалааҕын туһунан суруйбутум.
edersaas.ru
СӨ ИДьМ-тын пресс-сулууспата иһитиннэрбитинэн, ис дьыала уорганнара оҕо куттала суохтук, сэрэхтээхтик сылдьарыгар улахан болҕомтолорун уураллар, ити хайысханан тиһигин быспакка үлэ ыыталлар. Ордук чуолаан, бу сайыҥҥы — оҕолор сынньанар, көҥүл соҕустук көччүйэр — кэмнэригэр.
Полиция бэлиэтииринэн, ийэ-аҕа өттүттэн сороҕор хонтуруол мөлтөөн, ханнык эрэ түгэҥҥэ оҕо көрүүтэ-истиитэ суох хаалан, хобдох содулга биитэр иэдээҥҥэ тиэрдэр быһылааннар тахсаллар.
Ол курдук, бу ааспыт өрөбүллэргэ Дьокуускай куорат Даркылаах оройуонугар икки оҕо, Горнай улууһугар биир оҕо ууга суорума суолламмыттар.
Итинник хомолтолоох быһылааннары сэрэтэр туһуттан сокуоннай саастарын ситэ илик оҕолор дьыалаларыгар иниспиэктэрдэр оҕо сынньанар лааҕырдарыгар, сөтүөлүүр сирдэргэ сылдьан, бэсиэдэлэри ааҕаллар, ууга сэрэхтээх буолууну кэпсииллэр.
Биир оннук сырыы кэмигэр, киин куорат 202-с микро-оройуонугар баар сөтүөлүүр сиргэ улахан киһи арыалдьыта суох сылдьар 4 уонна 5 саастаах оҕолору булбуттар. Бу чахчыларынан оҕолор төрөппүттэригэр административнай боротокуол толорбуттар. Арай полиция үлэһиттэрэ түбэһэ кэлбэтэх буоллуннар ити кэмҥэ? Туох буолуоҕун киһи саныан да куттанар.
Күндү төрөппүттэр, полицейскайдар маннык куйаас күннэргэ оҕолоргутун кыраҕытык кэтии, көрө-истэ сылдьаргытыгар баҕараллар.
Маннык быһылааннар тахсыбаттарын туһугар РФ Ыксаллаах быһыыга-майгыга министиэристибэтин Саха сиринээҕи управлениета биэрбит сүбэлэрин өссө төгүл санатабыт:
* Төрөппүттэр, кыра саастаах оҕолоргутун ууга көрүүтэ-истиитэ суох ыытан кэбиһимэҥ, хараххыт далыттан сүтэримэҥ;
* Сөтүөҕэ анамматах, көҥүллэммэтэх сирдэргэ сөтүөлээмэҥ;
* Билбэт уугутугар умсумаҥ;
* Хааччахтаммыт кыраныыссаны бэлиэтиир буйдар анараа өттүлэригэр барымаҥ;
* Ууга устар көлөлөргө (мотуордаах, баарыстаах, эрдиилээх тыыларга уо.д.а) чугаһаамаҥ;
* Ууга билбэт сиргититтэн, ыстанарга анамматах үрдэллэртэн ыстанымаҥ;
* Итирдэр утахтары иһимэҥ, ууга итирик кииримэҥ;
* Ууга умсууну уонна сөтүөлээччини тутан ылыыны кытта сибээстээх оонньуулары оонньоомоҥ;
* Мэниктээн, ууга түһэн эрэрдии сымыйа түрүлүөнү таһааран хаһыытаамаҥ;
* Ол-бу хаптаһыннарга, бэрэбинэлэргэ, массыына хаамыраларыгар, үрүллүбүт матараастарга сытан устумаҥ;
* Ууну сыыһырдымаҥ, киртитимэҥ;
Сайыҥҥыт этэҥҥэ аастын!
Вера МАКАРОВА, «Саха сирэ» хаһыат, edersaas.ru
Хаартыска: СӨ ИДьМ-тын пресс-сулууспата.