Сарсын, олунньу 17 күнүгэр, «Куруһаала» эргиэн эрээттэригэр үгэскэ кубулуйбут «ДАРХАН УУС» Саха сирин тимир уустарын IX сүрүн быыстапката, төрүт дорҕоон мэтрдара Клавдия уонна Герман Хатылаевтар салайар «Тэтим» этно-бөлөхтөрүн доҕуһуолунан, дирбиэннээхтик арыллаары турар.
Саха сирин тимир уустара «Дэгиттэр быһах», «Бастыҥ ас быһаҕа» уонна «Бастыҥ уус-уран оҥоһуулаах быһах» диэн үс көрүҥҥэ бастыҥтан бастыҥ аатын былдьаһыахтара. «ДАРХАН УУС» быыстапка тэрийэр бөлөҕөр киирбит сайаапкаларга олоҕуран эттэххэ, былырыын «Бастыҥ ас быһаҕар» бастаабыт Егор Плотников (Мэҥэ-Хаҥалас), «Бастыҥ уус-уран оҥоһуулаах быһах» кыайыылааҕа Виктор Кычкин (Чурапчы) кытта, ол эбэтэр титулларын көмүскүү кэлиэхтээхтэр. Онтон былырыын улахан уустары «умса ууруох» буолан кэлбит уонна, кырдьык да, соһуччу «Дэгиттэр быһах» көрүҥүгэр бастыҥ аатын ылбыт Эдьигээн ууһа Артем Ханчаев аата быйылгы кыттааччылар испииһэктэригэр, тоҕо эрэ, суох…
«ДАРХАН УУС» быыстапкаҕа «Уус-экспо» эрдэҕиттэн «Дэгиттэр быһах» уонна «Бастыҥ ас быһаҕа» көрүҥнэргэ үгүстүк кыайыы көтөллөммүт биир кыһаттан тахсыбыт «көмүс» «троица» – Петр Луковцев, Иннокентий Татаринов, Айаал Ючюгяев быйыл да кытта кэлиэхтэрэ. Ол эрээри, Луковцев уонна Татаринов былырыыҥҥыттан быыстапка экспердэ буолбуттарынан, быйыл Айаал Ючюгяев эрэ куоталаһыыга кыттара уонна, биллэн турар, кыайыылаах үрдүк аатын эрэ былдьаһара күүтүллэр. 2016, 2017 сыллардаахха субуруччу «Бастыҥ ас быһаҕар» миэстэлэспит Сергей Мандаров, «Бастыҥ уус-уран оҥоһуулаах быһахха» 2015, 2017 сыллардааҕы призер Сергей Тарабукин (иккиэн Таатталар) да, «бойобуой» туруктаахтара чахчы.
Сарсыҥҥы Саха сирин уустарын сүрүн быыстапкатыгар Сунтаартан, Ньурбаттан, Үөһээ Бүлүүттэн, Бүлүүттэн, Кэбээйиттэн, Тааттаттан, Чурапчыттан, Уус Алдантан, Мэҥэ-Хаҥаластан, Намтан, Хаҥаластан, Дьокуускай куораттан уонна кини чугаһынааҕы бөһүөлэктэртэн 50-тан тахса уус кыттыаҕа. Кыттааччылар уһук туочукаларынан урукку кэмҥэ быыстапкаҕа кытта илик Өлөөн улууһа бэлиэтэннэ.
СӨ Тимир уустарын сойууһун бэрэссэдээтэлэ, духуобунас академига Борис Неустроев-Мандар Уус салайааччылаах дьүүллүүр сүбэҕэ Роман Готовцев-Мындыр Уус уонна Сарыал Билюкин курдук өрөспүүбүлүкэ бастыҥ уустара үлэлиэхтэрэ. «Бастыҥ ас быһаҕын» өрүү буоларыныы сахалыы ас «маэстрота» Иннокентий Тарбахов көмөлөһөөччүлэриниин талыаҕа. Онтон Россия худуоһунньуктарын сойууһун чилиэнэ Дьулустаан Бойтунов уустар уус-уран таһымнарын тургутуоҕа.
Сарсыҥҥы «ДАРХАН УУС» Саха сирин тимир уустарын IX сүрүн быыстапкатын билиһинннэрдэххэ, 11 ч. «Бастыҥ уус-уран оҥоһуулаах быһах» куоталаһыы, 12:30 ч. үөрүүлээх арыйыы, 13:30 бириэмэҕэ «Бастыҥ ас быһаҕа» уонна 15 ч. «Дэгиттэр быһах» көрүҥнэригэр тургутуктар, 17 ч. быыстапка сабыллыыта буолуохтара. Кэлиҥ, көрүҥ, кэрэхсээҥ!
Санатар буоллахха, «ДАРХАН УУС» Саха сирин тимир уустарын IX сүрүн быыстапкатын СӨ Тимир уустарын сойууһа уонна бу тэрээһини аан бастаан саҕалаабыт С.В. Попов доҕотторо, СӨ Культураҕа уонна духуобунай сайдыыга миниистиэристибэтин уонна Дьокуускай куораттааҕы «Таатта» түмсүү өйөбүллэринэн, тэрийэллэр. Тэрийэр бөлөҕү СӨ Тимир уустарын сойууһун толорооччу дириэктэрэ Николай Акимов салайар.
Гаврил АНДРОСОВ,
«ДАРХАН УУС» Саха сирин тимир уустарын сүрүн быыстапкатын пресс-сэкирэтээрэ