Хайыы үйэ үгэскэ кубулуйбут Саха сирин тимир уустарын быыстапката «Дархан Уус» быйыл олунньу 16-17 күннэригэр «Куруһаала» атыы-эргиэн уораҕайын эрээттэригэр 10-с төгүлүн Туймаада хочотун олохтоохторун уонна ыалдьыттарын түмүөҕэ.
Быйылгы дуорааннаах түһүлгэҕэ Саха сирин үгүс түбэлэриттэн тимир ыллатар уустар ох курдук оҥостон, кустук курдук куоһанан кэлэн бэйэ-бэйэлэрин икки ардыларыгар, «Уус-уран оҥоһуулаах быһах», «Булт бастыҥ быһаҕа», «Аска-үөлгэ бастыҥ быһах» хайысхаларга уус «Оскарын» иһин күрэс былдьаһыахтара, сыл бастыҥтан бастыҥнарын талыахтара.
Бу эрэ күннэргэ дьон-сэргэ тимир уустарын кытта атах тэпсэн туран көрсөн, кинилэр оҥоһуктарын чэрдээх ытыстарыттан быһа ылар кыахтаныа.
Санатар буоллахха, «Дархан Уус» быыстапканы аан бастаан, П.А.Ойуунускай аатынан судаарыстыбаннай бириэмийэ лауреата Борис Неустроев-Мандар Уус уонна саха быһаҕын аар саарга аатырдыбыт норуот маастара Сарыал Билюкин баҕаларын олоххо киллэрэн, күөгэйэр күнүгэр орто дойдуттан суох буолбут предприниматель уонна меценат Серафим Попов саҕалаабыттара. Билигин Саха сирин тимир уустарын сүрүн быыстапкатын Саха Өрөспүүбүлүкэтин тимир уустарын сойууһа уонна тэрийэр бөлөх, Култуура уонна духуобунай сайдыы миниистиэристибэтин, Дьокуускай куораттааҕы «Таатта түмсүү» өйөбүллэринэн, сылын ахсын иилээн-саҕалаан ыыталлар.
Үбүлүөйдээх быыстапка бастакы күнүгэр Мандар Уус «Саха билээҕэ» диэн быһах араас көрүҥнэриттэн саҕалаан батыйаҕа, батаска, үҥүүгэ тиийэ түмүллүбүт баай коллекцията кэлэн бар дьоҥҥо көрдөрүллүө. Ону тэҥэ, саха биилээҕин хайдах туттулларын анал идэлээхтэр билиһиннэриэхтэрэ.
Иккис күҥҥэ тимир уустара саха быһаҕын кыаҕын тургутан көрдөрүөхтэрэ уонна быһаҕы сытыылааһын кистэлэҥнэригэр уһуйуохтара.
Гаврил АНДРОСОВ,
«Дархан Уус» Саха сирин тимир уустарын сүрүн быыстапкатын пресс-сэкирэтээрэ.
«Саха сирэ» хаһыат, edersaas.ru саайтка анаан