Киһи батсаап үгүс сонуннарын итэҕэйбэт. Ол сөп даҕаны.
edersaas.ru
Бу күннэргэ батсаап группаларыгар: “Саха араадьыйата саха тылын төрдүттэн эhиигэ биир улахан, хаhан да умнуллубат хардыыны онордо. Үйэтин тухары саха тылын туруулаhан туран көмүскээбит Улуу киhи Дапсы биэриитин сапта”, — диэн иһитиннэрии кэллэ.
Бу төһө олохтооҕун билээри, “Тэтим” Саха араадьыйатын дириэктэрэ Максим Березинтан ыйыталастым. Онуоха салайааччы бу курдук хоруйдаата:
— Михаил Алексеев-Дапсы салалтаҕа бэйэтэ: “Кэлэрим-барарым ыараата, сааһырдым. Онон тохтууһубун”, —диэн этиилээх киирбитэ. Биһиги хайдах да 25 сыл устата Саха араадьыйатыгар үлэлээбит ытыктанар киһини: “Тохтоо, уурай”, — диир кыахпыт суох. Михаил Петровичка интэриэһинэй биэриилэри ыытарын иһин махталбыт муҥура суох. Дапсы сэтинньи 6 күнүгэр 81 сааһын туолуоҕа. Онон биһиги сэтинньи 7 күнүгэр – Саха араадьыйатын төрөөбүт күнүгэр убаастанар уопсастыбаннай кэрэспэдьиэммитин анаан чиэстээри сылдьабыт.
… Онон батсаап иһитиннэриитэ олоҕо суох буолан биэрдэ. Олоҕун саха тылын сайдыытыгар анаабыт биллиилээх саха лингвиһэ, филологическай наука хандьыдаата, араадьыйаҕа биэрии ааптара, ытык кырдьаҕас Михаил Алексеев-Дапсыны тапталлаах араадьыйатын үлэһиттэрэ анаан чиэстээн-бочуоттаан атаарыахтара.
Елена ПОТОЦКАЯ, «Саха сирэ» хаһыат, edersaas.ru
Хаартыска — интернеттэн.