Үөһээ Бүлүү Далыр нэһилиэгин Үлэ учаастагар 1980-с сылларга үлэлии сылдьыбыт лааҕыры СӨ Судаарыстыбаннай Мунньаҕын (Ил Түмэн) дьокутаата Феодосия Габышева уонна үөрэх, наука миниистирин солбуйааччы Владимир Тихонов кыттыылаах сөргүтэн арыйдыбыт.
Лааҕыр урукку аатын «Трудовой-81» диэни илдьэ хаалла. Күн бүгүн, бастакы сезоҥҥа улуус араас нэһилиэгиттэн 60 оҕо 14 күн хоно сытан сынньанар. Оҕолору 14 үлэһит көрөр-истэр, үөрэтэр, аһатар. Күҥҥэ биэстэ аһыыллар. Үүт аһылыгы Трудовой арыы сыаҕыттан уонна Үөһээ Бүлүүтээҕи ас-үөл кэмбинээтиттэн күн аайы сибиэһэйдии аҕалыллар. Эт, балык астарынан Далыртан, Мэйиктэн хааччыллаллар.
Күн аайы анал бырагырааманан тренердэр, психологтар быраас кэтэбилинэн оҕолору дьарыктыыллар. Онон, лааҕыр бары өттүнэн толору сэбилэннэ: ороннор Дьокуускай куоракка омук маһынан («Марсель» анал бырайыагынан), остуоллар, олоппостор, таҥас ыйыыр тэриллэр, оҕолор тус-туһунан туттар ячейкалара «Үс кут” хампаанньаларга оҥоһулуннулар.
Элбэх үлэни Далыр, Мэйик, Боотулуу, Оҥхой, Хоро, Дүллүкү оскуолаларын кэллэктииптэрэ үллэстэн үлэлээтилэр. Далыр олохтоохторо күргүөмүнэн тахсан, ыраастаныы, хомуйуу үлэтигэр сырыттылар. Маны таһынан, үөрэх салалтата, бокса оскуолата, оҕо технопарката, ДЮСШ үлэлэстилэр.
Лааҕыр тэрийэр сорукпун өйөөбүт дьоммор: улуус баһылыгар Владимир Поскачиҥҥа, кини бастакы солбуйааччытыгар Семен Михалевка, улуус сэбиэтин бэрэссэдээтэлигэр Николай Николаевка, үлэлэспит кэллэктииптэргэ махталбын биллэрэбин.
Тус махталбын урбаанньыттарга Семен Тумусовка, Светлана Сортоловаҕа, Николай Еттяновка уонна кыһыл тылбар эрэнэн, таспыт-аҕалбыт поруом хаһаайыттарыгар тириэрдэбин. Семен Тумусов өрүс уҥуор маҕаһыыннардааҕа олус абыраата, лааҕыр кэмигэр арылынна. РЭС үлэһиттэрэ уот ситимин саҥаттаан тардан, ыйбыт сирбитигэр кырааскалаах баҕаналары туруоран саамай улахан кыһалҕаны, ититиини быһаардыбыт. Билигин дьиэ барыта кэмбиэктэринэн сылыйар, душтар итии-тымныы уулаахтар, куукуна толору хааччыллыылаах, бассейн уутун ыраастыыр улахан носуос, фильтр уокка холбоннулар.
Далыр, Трудовой олохтоохторо сэбиэскэй кэм баайын — лааҕыры ыспакка, алдьаппакка күн бүгүҥҥэ диэри тириэрдэннэр, аһара баран дьиэлэргэ былыргы люстралара кытары ыйанан тураллар этэ. Ол да иһин, бу лааҕыр түргэнник үлэҕэ киирдэ. Кинилэргэ оҕолорго оҕо саас күндү кэмнэрин бэлэхтээтилэр.
Спиридон БОРБУЕВ, “Саха сирэ”, edersaas.ru сайтка анаан