Үөһээ Бүлүү уһуйааннара Далыр Васильевтарыгар 121 тыһ. солк. көмө ууннулар
Балаҕан ыйын 1 күнүгэр Саха сиригэр уһуйааннар аһыллыбыттара 100 сыллаах үбүлүөйүн анал идэлээх иитээччилэр араастаан бэлиэтээтилэр.
edersaas.ru
Ким социальнай ситимнэринэн эҕэрдэлэстэ, ким — төлөпүөнүнэн. Сыстыганнаах дьаҥ турбут кэмэ буолан, далааһыннаах бэлиэтээһин суоҕун тэҥэ.
Оттон Үөһээ Бүлүү улууһун 14 оҕо уһуйаана 7 оҕолоох Васильевтар дьиэ кэргэннэригэр 121 тыһыынча солкуобайы хомуйан көмө ууннулар. Бу — айан суолугар массыына саахалыгар түбэспит ийэлээх Далыр нэһилиэгин улахан дьиэ кэргэҥҥэ соһуччу уонна үөрүүлээх түгэн.
Ийэ дойдуга бэриниилээх буолуу сылыгар Үөһээ Бүлүү улууһун уһуйааннара бастыҥ холобуру көрдөрдүлэр. Маны этэн эрдэхтэрэ: «Ойуурдаах куобах охтубат…» — диэн.
Бу бэртээхэй аһымал-аахсыйа туһунан Үөһээ Бүлүүтээҕи Үөрэх управлениетын салайааччыта Спиридон Борбуев иһитиннэрдэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — Спиридон Борбуев тиксэриитэ.
+1
+1
+1
+1
+1
+1
+1