“Далбар Хотун” өрөспүүбүлүкэтээҕи куонкурус онус төгүлүн ыытыллыа. Куонкуруһу “Сахабэчээт” уонна “Далбар Хотун” сурунаал эрэдээксийэтэ тэрийэн ыыталлар. Түмүктүүр түһүлгэтэ кулун тутар 23 күнүгэр күнүс 4 чаастан ХИФУ “Сэргэлээх уоттара” култуура киинигэр буолуоҕа.
Күрэс тыа сиригэр олорон уйгуну уһансар, алаһа дьиэтин араҥаччылыыр, талба талааннаах, хоһуун үлэһит, холобур буолар ийэ аатын өрө көтөҕүүгэ, кинилэргэ уопсастыба болҕомтотун тардыыга анаан тэриллэр.
Быйылгы күрэскэ өрөспүүбүлүкэ сэттэ улууһуттан талыллан, бүтэһик түһүмэххэ тахсыбыт күн күбэй ийэлэр: Ньурбаттан Валентина Иванова, Өлөөнтөн Сардаана Николаева, Тааттаттан Марита Потапова, Намтан Айталина Рожина, Горнайтан Анна Румянцева, Үөһээ Бүлүүттэн Сусанна Семенова, Чурапчыттан Прасковья Смирникова кыттыахтара.
Кылгастык билиһиннэртиир буоллахха, кыттааччылар бары үстүү-биэстии оҕолоохтор, сиэннэрдээхтэр. Холобур, Прасковья Петровна 5 оҕолоох, 13 сиэннээх. Чурапчытааҕы гимназияҕа коменданынан үлэлии-хамсыы сылдьар. Ыраах Өлөөнтөн кэлэн кыттар Сардаана Николаевна биэс оҕолоох, түөрт сиэннээх, ЫБММ учаастагын иниспиэктэрэ. Ити курдук бары да улахан дьиэ кэргэн тапталлаах ийэлэрэ, амарах эбэлэрэ, нэһилиэктэригэр дьону-сэргэни хамсатар көхтөөх уопсастыбанньыктар.
Кинилэр номнуо кулун тутар 19 күнүттэн Дьокуускайга кэлэн, психологы кытта үлэлиэхтэрэ, “Россия – моя история” мусуойга сылдьыахтара, киэргэнэн-симэнэн фотосессияҕа түһүөхтэрэ, “Арассыыйа ийэлэрэ” хамсааһын, СӨ Дьахталлар түмсүүлэрин сойууһун актыбыыскаларынаан “төгүрүк остуолга” кыттыахтара. Ону тэҥэ кинилэри “Стимул” кулууп салайааччыта Матвей Лыткин хаалыктаах хаамыы кистэлэҥнэригэр үөрэтиэҕэ.
Түмүктүүр дьоро киэһэҕэ күрэс кыттааччылара түөрт түһүмэҕинэн бэйэлэрин, дьиэ кэргэннэрин билиһиннэриэхтэрэ, талба талааннарын көрдөрүөхтэрэ. Күрэс түһүлгэтин эстрада сулустара Анатолий Бурнашов, Виталий Очиров, уо.д.а. киэргэтиэхтэрэ, дьахтар, ийэ кэрэтигэр сүгүрүйэн ыллыахтара-туойуохтара.
Далбар Хотун аатын ылбыт кылбар кыайыылаах сүрүн спонсор “Туймаада-Лизинг” тэрилтэ туруорар Синтай тыраахтарынан наҕараадаланыаҕа. Бу дьоро киэһэҕэ кэлбит хас биирдии көрөөччү үбүлүөйгэ анаммыт бэлэҕи тутуоҕа.
Ангелина ВАСИЛЬЕВА, “Саха симрэ” хаһыат, edersaas.ru
Хаартыскаларга: «Далбар Хотун» куонкурус урукку сыллардаах кыттааччылара