Тыа сирин дьахталларын олохторугар уопсастыба болҕомтотун тардар сыаллаах өрөспүүбүлүкэтээҕи “Далбар Хотун” куонкурус быйыл тохсус төгүлүн ыытыллар. Куонкурус бу сылларга чөл олохтоох, бигэ туруктаах, элбэх оҕолоох ыал ийэтин, сатабыллаах хаһаайка үтүө холобурун сырдатан, тарҕатан кэллэ.
Ангелина ВАСИЛЬЕВА, «Саха сирэ» хаһыат, edersaas.ru
Быйылгы куонкурус олунньу 25 күнүгэр “Сэргэлээх уоттара” култуура киинигэр ыытыллыа. Олунньу 9 күнүгэр диэри сайаапкалары ыла тураллар. Кэтэхтэн ыытыллар сүүмэрдиир туур олунньу 10 күнүгэр ыытыллан, 7 кыттааччыны финалга талаллар.
“Далбар Хотун” быйылгы уратытынан, 50 саастарын ааспыт хотуттары кытыннарар буоллулар. Урут 45 саастаахтар эмиэ кыттар этилэр. Кыттааччылар үстэн элбэх оҕолоох, тыа сиригэр олорор, бэйэ хаһаайыстыбалаах, талба талааннаах, кэрэ сэбэрэлээх буолуохтаахтар. Кылгас видеоролик оҥорон ыыталлар.
Куонкурус иннинэ биир нэдиэлэ эрдэ кэлэн, далбар хотуттар бары бииргэ араас култуурунай тэрээһиннэргэ сылдьаллар, сынньаналлар, бэйэлэрин көрүнэргэ, киэргэнэргэ үөрэнэллэр. Бу дьиэ-уот кыһалҕатыттан тэйэн, бэйэни сайыннарарга, дьахтар айылгытын уһугуннарарга туспа бырааһынньык курдук буоллаҕа эбээт. Дьахтар бэйэтин көрүнэр буоллаҕына, хаһан баҕарар кэрэ сэбэрэлээх, сылааһынан сыдьаайар аналлаах.
Куонкурус үс түһүмэхтээх. Сахалыы маанытык таҥнан тахсан бэйэлэрин билиһиннэрэллэр, айар түһүмэххэ ыллаан, үҥкүүлээн, о.д.а. талба талааннарын көрдөрөллөр, аһымал аукциоҥҥа эрдэ бэлэмнээн кэлбит астарын көрөөччүлэргэ атыылыыллар.
Аһымал аукцион – куонкурус күүтүүлээх түгэнэ диэтэххэ, сыыһа буолбат. Кыттааччылар саха аһын маанытын, күндүтүн астаан аҕалбыттарын көрөөччүлэр балачча ыарахан сыанаҕа атыылаһаллар. Былырыыҥҥы кыайыылаах Людмила Павлова булт этиттэн тыатааҕы баппаҕайыгар тиийэ араас бүлүүдэ астаан аҕалан, көрөөччүлэри сөхтөрбүтэ. Аукционтан киирбит үп инбэлиит оҕо эмтэнэригэр ананар. Былырыын Дьулус Петров эмтэнэригэр бэриллибитэ.
Кыайыылаахтарга сэттэ анал аат иҥэриллэр. Ону тэҥэ СИА сайтыгар куоластааһын ыытыллан, көрөөччү биһирэбилин ылбыт кыттааччыга туспа бириис бэриллэр. Оттон “Далбар Хотун” аатын ылбыт кыайыылаахха урут тыраахтар бириис туттарыллар этэ.
Ангелина ВАСИЛЬЕВА, «Саха сирэ» хаһыат, edersaas.ru
Кыттыы туһунан Dalbar2010@mail.ru суруйан, эбэтэр 8(4112)420064 эрийэн билсиэххэ сөп.