«Далбар Хотун» өрөспүүбүлүкэтээҕи Х күрэһи көрсө «Далбар Хотун» анал сурунаал күн сирин көрдө.
Анал сурунаал бастакы сирэйигэр 2007 сылтан саҕалаан, 9 күрэс кыайыылаахтарын уопсай хаартыската бэчээттэммитэ кыайыылаах далбардар мэлдьи олох инники күөнүгэр сылдьалларын кэрэһилиир.
Өрөспүүбүлүкэ кыайыылаах Далбар Хотуттарын: Лидия Афанасьеваны, Галина Габышеваны, Марфа Иванованы, Ирина Захарованы, Екатерина Винокурованы, Лидия Сивцеваны, Татьяна Ворогушинаны, Людмила Павлованы, Туйаара Егорованы киэн тутта ааттыыбыт.
Кинигэ-сурунаал аан тылыгар “Сахабэчээт” генеральнай дириэктэрэ Филипп Пестряков:
“Республикаҕа биһирэммит “Далбар Хотун” күрэс туһунан, кини кыттыылаахтарын, кыайыылаахтарын, тэрийээччилэрин, көмөлөһөөччүлэрин үтүө ааттарын үйэтитэр, дьон-сэргэ билиитигэр таһаарар санаанан салайтаран, кинигэ-альбом таһаарарга сүбэлэспиппит. Ол олоххо киирэн эрэриттэн ис сүрэхпиттэн үөрэбин. Дьоһун бэлэхпитин “Далбар Хотун” сурунаал ааҕааччыларыгар утары уунабыт. Дьоллоох олохтоох, үтүө доруобуйалаах, сарсыҥҥы күҥҥэ эрэллээх буоларгытыгар баҕарабын”, – диэн истиҥ тыллары анаабыт.
Күрэс ыытыллыбыт кэмнэригэр “Далбар Хотун” сурунаалга эрэдээктэрдээбит Наталья Харлампьева, Аита Шапошникова, кэнники сыллар эрэдээктэрэ Галина Полускина уонна Зинаида Архипова күрэс туһунан санаалара киллэриллибиттэр. Күрэһи көҕүлээбит, тэрийсибит Светлана Лукина, Афанасий Ноев, уо.д.а. ааспыт үтүө кэмнэргэ эргиллэн ылбыттар. Аан бастакы күрэскэ кылаабынай бирииһи туруоран, тэрийээччилэр санааларын көтөхпүт, өйөөбүт меценат Татьяна Эверстова уонна күн бүгүҥҥэ диэри “Синтай” тыраахтары туруорар “Туймаада-Лизинг” генеральнай дириэктэрэ Павел Федоров баҕа санаалара кыайыылаахтар дьиэ кэргэттэрин үрдүккэ кынаттаабыта саарбаҕа суох.
Хас биирдии кыайыылаахха туспа страницалар бэриллибиттэрэ сурунаал чуолаан кинилэргэ анаммытын туоһулуур. Манна хас биирдиилэрэ кыайыы өрөгөйүн билбит кэминээҕи интервьюларыттан уонна билиҥҥи санааларыттан кэрчиктэр бэчээттэммиттэрэ сурунаал ис хоһоонун байытар. Хас биирдиилэрин уонна уопсай хаартыскалар верстальщик Гаврил Попов кыраҕы хараҕынан таҥыллыбыттар.
Бэҕэһээ, “Далбар Хотун” Х күрэскэ кэлбит ыалдьыттар бу сурунаалы бэлэх тутаннар, тэрийэн таһаарааччы “Сахабэчээт” автономнай тэрилтэҕэ, ол иһигэр сурунаал эрэдээксийэтигэр, махтал тылларын эттилэр.
Надежда ЕГОРОВА, “Саха сирэ” хаһыат, edersaas.ru