«Далбар Хотун» өрөспүүбүлүкэтээҕи куонкуруска Мэҥэ Хаҥалас Суолатыттан үс оҕо ийэтэ, үс сиэн эбэтэ Туйаара Егорова кыайда. «Синтай» тыраахтарынан наҕараадаланна.
Быйылгы куонкуруска улуустарыгар улахан тургутууну ааһан, бастыҥынан ааттаммыт кэрэ-мааны Галина Васильева (Ньурба улууһа, Антоновка с.), Людмила Иванова (Нам, Кириэс Кытыл с.), Туйаара Егорова (Мэҥэ Хаҥалас, Суола с.), Мария Иванова (Амма с.), Екатерина Котоконова (Үөһээ Бүлүү, Ороһу с.), Дария Старостина (Таатта, Чычымах), Ия Федорова (Өлөөн с.) кэллилэр.
Финалга киирбит сэттэ кыттааччы түөрт түһүмэххэ күрэхтэстэ: бэйэни билиһиннэрии, айар талаан, киэһээҥҥи былааччыйалаах тахсыы уонна бүлүүдэ куонкуруһа. Бүлүүдэлэри көрөөччүлэргэ аукционнаан, 200-чэкэ тыһ. солк. эпэрээссийэҕэ барыахтаах оҕоҕо биэрдилэр.
Түмүк:
«Уран Хотун» — Мария Иванова (Амма)
«Мааны Хотун» — Ия Федорова (Өлөөн)
«Аҋыы Хотун» — Людмила Иванова (Нам)
«Талба Хотун» — Дария Старостина (Таатта)
«Сайдам Хотун» — Екатерина Котоконова (Үөһээ Бүлүү)
«Иэйии Хотун» — Галина Васильева (Ньурба)
«Далбар Хотун» — Туйаара Егорова (Мэҥэ Хаҥалас)
«Далбар Хотун» куонкурус.
ЫСПЫРААПКА:
— Бастакы куонкурус 2007 с. кулун тутар 5 күнүгэр А.Е.Кулаковскай аатынан Култуура киинигэр ыытыллыбыта. Куонкурус кыайыылааҕа Хаҥалас улууһун Нөмүгүтүттэн кэлбит 5 оҕолоох ийэ, предприниматель Лидия Афанасьевна 100 тыһыынча солкуобай бирииһинэн наҕараадаламмыта.
— Иккис куонкурус 2009 с. кулун тутар 8 күнүгэр эмиэ А.Е.Кулаковскай аатынан Култуура киинигэр тэриллибитэ. Кыайыылаах – Хатаска олорор 5 оҕолоох ийэ Галина Габышева 100 тыһыынча солкуобайы туппута.
— Үһүс куонкурус 2011 с. кулун тутар 3 күнүгэр «Сэргэлээх уоттара» Култуура киинигэр элбэх көрөөччү биһирэбилин ылбыта. Кыайыылаах – Мэҥэ Хаҥалас Төҥүлүтүн 3 оҕолоох ийэтэ Марфа Иванова «Туймаада-Лизинг» туруорбут «Синтай» дьоҕус тыраахтарын ылан, дойдутугар өттүк харалаах, илии тутуурдаах төннүбүтэ. Бу сылтан ыла кыайыылаахтар бары «Синтай» тыраахтарынан наҕараадаланан кэллилэр.
Куонкуруhу «Сахабэчээт» тэрилтэ СӨ Ыччат дьыалаларыгар уонна дьиэ кэргэн бэлиитикэтигэр министиэристибэ өйөбүлүнэн ыытар. Генеральнай партнердар — «Мас Арт» ХЭО, лотерея генеральнай партнера «Алдьыс Строй» тутуу хампаанньа, спонсордар «Алмаасэргиэнбаан» АО, Саха сирин аҕаларын лигата, «Азиатскай-Тихоокеанскай баан» ААО.
«Саха сирэ» хаһыат, edersaas.ru
Хаартыска: соц.ситимтэн.