СӨ «Сахабэчээт» судаарыстыбаннай автономнай тэрилтэ уонна «Далбар Хотун» сурунаал эрэдээксийэтэ, сурунаал тэриллибитэ 25 сыллаах үбүлүөйүн чэрчитинэн, куйаар ситимин нөҥүө бастакы күрэһи биллэрбитэ.
edersaas.ru, «Саха сирэ» хаһыат
Күрэс балаһыанньатынан, өрөспүүбүлүкэ араас улууһуттан 12 кыттааччы баҕатын биллэрбититтэн, дьүүллүүр сүбэ 7 киһини түмүктүүр түһүмэххэ киллэрбитэ. Кинилэр ортолоругар Дария Павлова (Үөһээ Бүлүү улууһун Үөһээ Бүлүү с.), Мария Аманатова (Нам улууһун Хамаҕатта с.), Боя Ноговицына (Чурапчы улууһун Уһун Күөл с.), Полина Осипова (Горнай улууһун Бэрдьигэстээх с.), Галина Павлова (Таатта улууһун Ытык Күөл с.), Татьяна Семенова (Мэҥэ Хаҥалас Хорообут с.), Тамара Винокурова (Эдьигээн улууһун Эдьигээн с.) бааллар.
Куоластааһын атырдьах ыйын 15 күнүттэн сарсыарда 9.00 чаастан саҕаламмыта, атырдьах ыйын 25 күнүгэр 21.00 чааска түмүктэннэ. Күрэс түмүгүнэн кыайыылаах аата билиннэ.
Саамай элбэх куолаһы ылбыт Дария Павлова (8988) “Далбар Хотун” күрэс кыайыылааҕынан ааттанна.
Куолас түмүгүнэн иккис миэстэҕэ Мария Аманатова (8981), үһүскэ Боя Ноговицына (4423) таҕыстылар. Дьүүллүүр сүбэ быһаарыытынан, атын кыттааччылар анал ааттарынан бэлиэтэниэхтэрэ.
Күрэс бары кыттыылаахтара алтынньы 11 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр “Далбар Хотун” сурунаал тэриллибитэ 25 сылын бэлиэтиир үөрүүлээх тэрээһиҥҥэ наҕараадаланыахтара.
БЫҺААРЫЫ:
Дария ПАВЛОВА — Үөһээ Бүлүү улууһун Үөһээ Бүлүү сэлиэнньэтин олохтооҕо, 1957 сыл сэтинньи 15 күнүгэр төрөөбүтэ. Дария Николаевна кэргэннээх, 3 оҕолоох, 5 сиэннээх. Үрдүк үөрэхтээх, бибилэтиэкэр идэлээх, оройуоннаааҕы Киин бибилэтиэкэҕэ бибилэтиэкэринэн үлэлиир. Бааһынай хаһаайыстыбалаах. «Санаа ситимэ» литературнай түмсүү, «Тэтим» үһүс саас кулуубун салайааччыта. Ыллыыр, үҥкүүлүүр, хоһоон ааҕар. Сценарий суруйар, театрализованнай көстүүлэри туруорар. Спордунан умсугуйар, хаартыскаҕа, видеоҕа түһэриинэн, литературнай айымньыны суруйуунан дьарыктанар. Иистэнэр.
Олоҕор ыра санаата: «Таптал, олох туһунан киинэлэри устуохпун, мемуардары суруйуохпун баҕарабын».
Мария АМАНАТОВА — Нам улууһун Хамаҕатта сэлиэнньэтин олохтооҕо. Мария Николаевна 1961 сыллаахха бэс ыйын 24 күнүгэр төрөөбүтэ. Кэргэннээх. 4 оҕолоох, 10 сиэннээх. Дьиэ кэргэнинэн сылгы иитиитинэн, оҕуруоту үүннэриинэн дьарыктаналлар. Кини — «Тупсууна» дьахталлар сэбиэттэрин бэрэссэдээтэлин солбуйааччы, «Ситим» кэллэксийэниэрдэр уопсастыбаларын бэрэссэдээтэлэ, «Дьэрэкээнэ» кийииттэр кулууптарын чилиэнэ. «Айыы Хотун» үҥкүү кэлэктиибигэр дьарыктанар, ыллыыр, туойар. Хаартысканан кинигэлэри оҥорор, иистэнэр.
Олоҕор ыра санаата: «Тапталлаах кэргэммин, сиэннэрбин, оҕолорбун кытта уһун үйэлэргэ дьоллоохтук олоруу» .
Боя НОГОВИЦЫНА — Чурапчы улууһун Уһун Күөл сэлиэнньэтин олохтооҕо. Боя Семеновна 1959 сыллаахха кулун тутар 5 күнүгэр төрөөбүтэ. Кэргэннээх, 4 оҕолоох, 12 сиэннээх. Дьокуускайдааҕы үп техникумум бүтэрбитэ, бухаалтыр идэлээх. «Чуунай» бааһынай хаһаайыстыба салайааччыта. Оҕуруотунан, сибэккини үүннэриинэн дьарыктанар, иистэнэр, айанныырын сөбүлүүр. Үҥкүүлүүр. Сылаҥ нэһилиэгин мунньаҕын икки ыҥырыытын дьокутаата, «Саһарҕа» дьахталлар сэбиэттэрин чилиэнэ, «Күбэйэ» үҥкүү ансаамбылын чилиэнэ.
Олоҕор ыра санаата: «Дьиэ кэргэним, сиэннэрим доруобай, этэҥҥэ буолалларыгар баҕарабын».
Надежда ЕГОРОВА, “Саха сирэ”, edersaas.ru