Бу хаартыскаҕа көрөр кырачаан кыыскыт аата Дайаана Гаврильева диэн. Кини Мэҥэ Хаҥалас улууһун Р.А. Бурнашов аатынан Табаҕа орто оскуолатын иккис кылааһыгар үөрэнэр. Сааһа — сэттэ.
Дайаана Гаврильева Табаҕатааҕы оҕо ускуустубатын дьиэтигэр иккис сылын дьарыктанар. Кыысчаан олох кыра эрдэҕиттэн муусуканы интэриэһиргиир эбит. Бастаан эһээтэ байааҥҥа оонньуурун болҕойон истэр буолбут, онтон салгыы хомуска оонньуурга үөрэммит. Маны сэргэ кини фольклор, уруһуй дьарыктарыгар сылдьар уонна музыкальнай үнүстүрүмүөннэргэ оонньуу үөрэнэр, үҥкүүлүүр.
Дайаана музыкальнай үнүстүрүмүөннэргэ ис сүрэҕиттэн баҕаран туран үөрэнэр. Билигин кинини Оҕо ускуустубатын оскуолатын преподавателэ Григорий Егорович Борисов классическай гитараҕа оонньуурга үөрэтэ сылдьар.
Ааспыт сайын Клим Федоров “Карантины сэргэхситиэххэ” диэн «Инстаграмҥа» ыыппыт куонкурһугар бүгүҥҥү дьоруойбут үнүстүрүмүөннэргэ оонньоон, элбэх куолаһы ылан бастаабыт эбит. Дайаана гитараҕа оонньуур, синтезаторы кыралаан тыаһатар уонна барабааннары охсор.
“Оҕобут сайдарыгар усулуобуйаны кыахпыт баарынан оҥоро сатыыбыт”, — диир Дайаана ийэтэ Туйаара Юристановна Михайлова. Төрөппүттэригэр: «Миэхэ үөрэтиҥ», — диэн хаайарын дьоно сатаабат буоланнар, Дайаана бэйэтэ интэриниэт ситимиттэн хасыһан үөрэнэр, араас үөрэтэр видеолары көрөр эбит. Билигин бэйэтин бас билиитигэр икки гитаралаах, ону тыаһатар, умсугуйан оонньоон үгүс дьону сөхтөрөр.
Кырачаан Дайаана дьаныардаахтык дьарыктанан, муусука эйгэтигэр бэйэтин аатын ааттатар киһи буолан тахсарыгар баҕарабыт.
Надежда ИЛЬИНА, edersaas.ru
Хаартыскалар, видеолар — Дайаана Гаврильева архыыбыттан.