Бу күннэргэ Дьокуускай куоракка “Эдэр профессионаллар” (WorldSkills Russia) V национальнай чемпионатын финала буола турар. Тэрээһин сүнньүнэн “Дохсун” спорт комплексыгар ыытыллар. Россия 82 субъегыттан 576 кыайыылаах кэлэн күрэхтэһэ сылдьар. Кинилэри уопсайа 593 эксперт кэтээн көрөр. Бу туһунан күрэхтэһии Саха сиринээҕи пресс-киинэ иһитиннэрэр.
Людмила Попова, “Саха сирэ” хаһыат, https://edersaas.ru/
Манна кыттааччылар “Өҥөнү оҥоруу” хайысха 16 хайысханан (асчыт дьыалата, рестораннай сервис, отель администратора, ветеринария, осетинныы бөрүөгү астааһын, интерьер дизайна, оскуола иннинээҕи иитии, кондитер дьыалата, медицинскэй лабораторнай анализ, медицинскэй уонна социальнай көрүү-харайыы, парикмахер искусствота, предпринимательство, алын кылаас учуутала, прикладной эстетика, туризм, килиэп буһарыыта) күрэхтэһэллэр.
Оттон “Промышленнай производство исписэлиистэрэ”, “IT-технология”, “Тутуу эйгэтин исписэлиистэрэ” салаалар финалларыгар эдэр профессионаллары сүүмэрдээһин Хабаровскай кыраайга, Татарстан, Чувашия өрөспүүбүлүкэлэригэр уонна Москва уобалаһыгар буолаллар. Ол түмүгэр, бастыҥнар ыам ыйыгар Краснодарга ыытыллар “Эдэр профессионаллар” (WorldSkills Russia) V национальнай чемпионаттарыгар кыттар кыахтаныахтара.
Күн бүгүн “Асчыт дьыалата”, “Рестораннай сервис” компетенцияларга күрэхтэһии түмүктэннэ. Асчыттар итии бүлүүдэни, итии уонна тоҥ сокуусканы, мин уонна десерт бэлэмнээн көрдөрүөхтээхтэр. Бу салааҕа Россия араас куораттарын үөрэҕин кыһаларыттан 60 устудьуон күөн көрүстэ. Кинилэртэн 15-һэ финалга киирэр быраабы ылла.
Оттон “Рестораннай сервис” компетенцияҕа 27 кыттааччы баар. Манна сүрүн ирдэбилинэн маастарыстыба, булугас сытыы өй, үчүгэй быһыы-майгы, ыалдьыттары кытта уопсай тылы булуу уонна официаннар дьоҕурдара буолар. Күрэхтэһии түөрт түһүмэҕинэн ааста. Эдэрдэр салфетканы 15 араас ньыманан уурууга, сыры киэргэтэн уурууга, фуршет бэлэмнээһиҥҥэ, остуолу тардыыга, винону сөпкө кутууга уо.д.а. сатабылларын көрдөрдүлэр. Үс күннээх күрэхтэһии кэнниттэн, финалга 6 кыттааччы кэккэтигэр Саха сириттэн Дайаана Дьяконова баар.
Людмила Попова, “Саха сирэ” хаһыат, https://edersaas.ru/