Арай биир күн батсаабынан дьахталларга аналлаах бөлөхпөр “Преображение” диэн бырайыак биллэриитэ кэллэ.
Варвара Попова, edersaas.ru, “Саха сирэ” хаһыат.
СӨ Ыччат уонна дьиэ кэргэн министиэристибэтин иһинэн үлэлиир Дьиэ кэргэҥҥэ уонна ыччакка социальнай-психологическай өйөбүл оҥорор киин тэрийэр эбит. Бырайыак ааптара — киин методиһа Зинаида Попова. Кинилэр бырайыакка кэлбит хас биирдии кэрэ аҥаар киһи быһыытынан ураты хаачыстыбатын арыйарыгар, саһан сытар кыаҕын, талаанын уһугуннарарыгар кыах биэрэллэр.
Ис кыахтарын арыйа
Барыта холбоон 30-тан тахса дьахтар кэлбит. Кинилэр истэригэр оҕотун көрөн олорор ийэлэр, эйэҕэс эбээлэр, эдэр кыргыттар, үлэлии сылдьар кэрэ аҥаардар бааллар. Бары бэйэ ис кыаҕын билээри, ону сөпкө туһанаары, саҥа дьоннуун билсээри, бириэмэни туһалаахтык атаараары кэлбиттэр.
Саха сиэринэн, кыбыстанньаҥмыт сүр. Бастакы дьарыкка психолог Саина Матвеева билсиһии тренинын ыытан, уопсай күүрүүнү киэр кыйдаан, түмүгэр билбэт киһигин кытта уруккуттан билсэр курдук турукка киллэрдэ.
Дьэ, онтон ыла бу бырайыак чэрчитинэн бэйэ уйулҕатын кытта билсэр, тапсар “айаҥҥа” туруннубут.
Дефиле
Сахабыт сирин кыһына тоҕус томороон ыйы мэлдьи сатыылаан, таһырдьа таҕыстыбыт эрэ тута моойбут кылгаан, сирэйбит-харахпыт тоҥмотун диэн төһө кыалларынан соммут иһигэр бүгэн, умса тутта сылдьабыт. Оннук тоҥхоччу туттан үлэбитигэр кэлээт, көмпүүтэр иннигэр эмиэ умса түһэбит. Дьэ, бу кэннэ туораттан хайдах көстөрбүтүн санаан көрүҥ. Араас хондуруос ыарыылар үөскүүллэрин киһи этэ да барбат. Оттон дефиле тренерэ Лена Захарова кыыс-аймах кырасыабайдык хамсанарыгар, хаамарыгар, дьон ортотугар тутта-хапта сылдьарыгар үөрэтэр. Тутта-хапта сылдьыы эмиэ бэйэтэ туһунан быраабылалардаах, кистэлэҥнэрдээх наука эбит. Бэйэҕэ эрэллээх буолуу биир төрүөтэ манна сытар.
Дэнс-аэробика
“Преображение” бырайыак кыргыттара дэнс-аэробиканан эмиэ дьарыктаналлар. Үгүс сүүрүүлээх-көтүүлээх бириэмэ, араас кыһалҕалар, быһаарыллыбат боппуруостар киһини, ордук дьахтар аймах уйулҕатын чарааһатыахтарын сөп. Оттон түргэн муусукалаах ритмҥэ үҥкүүлээн, күн устата мунньуллубут кыһалҕаны үҥкүү нөҥүө таһаараҕын. Үчүгэй энергетиканы хабан киһи настарыанньата көтөҕүллэр, санаата көнньүөрэр. Маны таһынан, дэнс-аэробика, биллэн турар, эти-хааны эрчийэр, быһыыны-таһааны чочуйар.
Йога
Йога туһатын туһунан уһуннук кэпсиэххэ сөп. Бастакынан, биллэн турар, киһи ис туругун, уйулҕатын, этин-хаанын чэбдигирдэр, киһи өйө-санаата сааһыланарыгар улахан дьайыылаах. Йоганан дьарыктанар киһи көхсө киэҥ, утуйар уута кытаанах буолар, күн-түүн чэбдигирэр. Кыттааччы кыргыттар йога киһини уоскутар диэн бэлиэтииллэр.
Түмүк
Маны таһынан, бырайыак чэрчитинэн, дьахталлар бөлөхтөрүнэн араас трениҥҥэ, консультацияларга сылдьаллар, маастар-кылаастары ылаллар. Хас биирдии кэрэ аҥаары кытта бырайыак устатын тухары тустаах анал психолог үлэлэһэр. Сахалар, уопсайынан, психолог диэн исписэлииһи соччо билиммэт норуот. Ол эрээри психолог уйулҕаны кытта үлэлэһэрин бэркэ диэн билэбит. Киһи хаһан баҕарар чөл туруктаах, бигэ тирэхтээх буоллаҕына, санаабытын ситиһиэн, баҕарбытын барытын толоруон сөп.
Кыттааччы кыргыттары өссө да элбэх интэриэһинэй саҥа арыйыылар, көрсүһүүлэр, бэсиэдэлэр күүтэллэр.
Варвара Попова, edersaas.ru, “Саха сирэ” хаһыат.