Саха сирин дьахталларын XV сийиэһин чэрчитинэн СӨ Доруобуйа харыстабылын министиэристибэтигэр ыытыллыбыт стратегическай сиэссийэҕэ демократия балаһыанньатын, дьахталлар доруобуйаларын тупсарыы, нэһилиэнньэни чөл олоххо тардыы боппуруостарын дьүүллэстилэр.
Сийиэс уонна Уһук Илиҥҥи дьахталлар форумнарын чэрчитинэн ыытыллыбыт стратегическай сиэссийэни СӨ Доруобуйа харыстабылын министиэристибэтэ, М.К.Аммосов аатынан ХИФУ Мэдиссиинэ киинэ, «Саха сирин учуонай дьахталлара» лига, «Арассыыйа ийэлэрэ» бүтүн Арассыыйатааҕы уопсастыбаннай хамсааһын Саха сиринээҕи отделениета тэрийдилэр.
СӨ Доруобуйа харыстабылын министиэристибэтэ иһитиннэрбитинэн, кэмпэриэнсийэҕэ 100-чэ киһи кыттыбытыттан кинилэр ортолоругар доруобуйа харыстабылын тэрийээччилэр, наука үлэһиттэрэ, аспираннар, ординатордар уонна магистраннар бааллар.
«Страгетическай сиэссийэ сүрүн соругунан өрөспүүбүлүкэбит эрэ буолбакка, Арассыыйа сайдыытын туһугар дьахталлар уопсастыбаларын түмүү буолар. Бүгүн биһиги дьахталлар доруобуйаларын харыстааһын уонна чэбдигирдии сүрүн боппуруостарын дьүүллэстибит. Кини доруобуйатыттан биһиги оҕолорбут инникилэрэ, ол эбэтэр өрөспүүбүлүкэбит кэскилэ эмиэ тутулуктаах», -– диэтэ СӨ доруобуйа харыстабылын миниистирин солбуйааччы Любовь Бурнашева.
Кыттааччылар араас тиэмэҕэ дакылааттары оҥордулар:
— «2021 сылга «Доруобуйа харыстабыла национальнай бырайыагы олоххо киллэрии сүрүн түмүктэрин туһунан уонна 2022 с. соруктара» -– мэдиссиинискэй наука хандьыдаата, СӨ доруобуйа харыстабылын миниистирин солбуйааччы Любовь Степановна Бурнашева;
– «СӨ дьахталларыгар онкология көмөтүн туруга» -– мэдиссиинискэй наука хандьыдаата, СӨ доруобуйа харыстабылын министиэристибэтин штаты таһынан кылаабынай онколога, СӨ онкологтарын ассоциациятын бэрэссэдээтэлэ Феодосия Гаврильевна Иванова;
– «Үлэлиир саастаах эр дьон өлүүтүн аҕыйатыы -– киһи кыаҕын харыстыыр суол» — СӨ доруобуйа харыстабылын министиэристибэтин мэдиссиинискэй сэрэтиигэ штаты таһынан кылаабынай исписэлииһэ, «Здоровое будущее» «Биир ньыгыл Арассыыйа» бартыыйынай бырайыагын уопсастыбаннай сэбиэтин, «Арассыыйа ийэлэрэ» бүтүн Арассыыйатааҕы уопсастыбаннай хамсааһын Саха сиринээҕи отделениетын президиумун чилиэнэ Алена Михайловна Никитина;
– «Өрөспүүбүлүкэ нэһилиэнньэтэ уһуннук олороругар «Кырдьаҕас көлүөнэ эрэгийиэннээҕи бырайыак кылаата» -– мэдиссиинискэй наука доктора, «Доруобуйа харыстабылын уонна уопсастыбаннай доруобуйаны тэрийиигэ исписэлиистэр уопсастыбалара» РОО бырабылыанньатын чилиэнэ Ольга Викторовна Татаринова;
– «Хотугу сир дьахталларын доруобуйаларын чэбдигирдиигэ «Арассыыйа ийэлэрин» кылаата» — «Арассыыйа ийэлэрэ» бүтүн Арассыыйатааҕы уопсастыбаннай хамсааһын Саха сиринээҕи отделениетын президиумун бэрэссэдээтэлэ Прасковья Петровна Борисова уо.д.а.
Надежда ЕГОРОВА, «Саха сирэ», edersaas.ru.