Доруобуйа Уопсастыба

«Дьахтар доруобуйата» бырайыакка кыттыс

Саха АССР 100 сылыгар уонна Ил Дархан биллэрбит Ийэ сылыгар СӨ доруобуйа харыстабылын министиэристибэтэ киэҥ араҥаҕа анаммыт “Дьахтар доруобуйата” диэн информационнай бырайыагы үлэлэтэн эрэр.

Бу бырайыак дьахталлар төрүүр-ууһуур кыахтарын, доруобуйаларын туругун бэрэбиэркэлииргэ уонна бу уорганнарга искэн ыарыыларын эрдэттэн буларга туһуламмыт.

Бырайыакка  Дьокуускайдааҕы 2-с, 3-с №-дээх балыыһалар, 1-кы №-дээх поликлиника, Дьокуускай куораттааҕы Мэдиссиинэ киинэ, “Белая роза-Саха” киин, өрөспүүбүлүкэтээҕи информационнай-аналитическай мэдиссиинэ киинэ кытталлар.

Бу манна дьахталларга климакс содулларын, эмиий искэнин, киэли тиэрбэһин искэнин (рак шейки матки), эндометриоз уонна оҕоломмот буолуу курдук ыарахан ыарыылар сибикилэрин чинчийиэхтэрэ. Бу ыарыылары төһөнөн эрдэ булаҕын да, соччонон эмтэнэр, үтүөрэр кыах улаатар.

Ханнык баҕарар кэрэ аҥаар интэриниэккэ киирэн, https://женское-здоровье-саха.рф аадырыһынан саайтка киирэн, Тус кэбиниэккэ регистрацияланан баран, анкетаны толоруон сөп. Ыарыы сибикитэ баар буоллаҕына, балыыһаҕа көрдөрүнэргэ ыҥыраллар.

Билиҥҥитэ 1600-тэн тахса дьахтар бу бырагыраамаҕа кыттыыны ылла диэн доруобуйа харыстабылын министиэристибэтин пресс-сулууспата иһитиннэрэр.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru.

0
0
Telegram @edersaas20