Дьахталларга саба түһүү — быһахтаах, тимир сыаптаах

Ааптар: 
Бөлөххө киир:

Киһи-аймах кэрэ аҥаарын — дьахтары — таптыы, сыллыы-ууруу, ытыс үрдүгэр эрэ илдьэ сылдьыллыахтааҕа эбитэ буолуо, дьиҥэр. Онуоха баара, хомойуох иһин, дьахтары харыстыахтааҕар, сиэртибэ оҥорон атаҕастааччы эр дьон баар ахан. 

edersaas.ru


Нерюнгри куоракка бэҕэһээ 32 саастаах киһи дьахтарга саба түһэн талаабытын туһунан РФ Росгвардиятын Саха сиринээҕи управлениетын пресс-сулууспата иһитиннэрдэ.

Көннөрү талаабыт эрэ буолбатах — өссө быһаҕынан кэтэххэ анньыбыт. Талааһын санаторий баар оройуонугар тахсыбыт. Эмсэҕэлээбит дьахтар билигин реанимацияҕа сытар.

Бу ыар буруйу оҥорууга уорбаланааччыны Росгвардия полицейскайдара сол күн туппуттар. Ыстааныгар уонна кууркатын сиэҕигэр хаан бээтинэлэрэ бааллар эбит. Дьахтар суумкатын бөрөстүүпүнньүк тыаҕа илдьэн бырахпытын булбуттар.

Бу чахчынан «Талааһын» ыстатыйанан холуобунай дьыала тэрилиннэ.

Оттон Ньурба улууһугар 41 саастаах рецидивист киһиэхэ суут бириигэбэрэ тахсыбыт.

Суут быһаарбытынан, бу дьыл олунньу ыйыгар бу киһи итирик сылдьан, икки дьахтары кытта кыыһырсыбыт, ол түмүгэр, биирдэрин тимир сыабынан көхсүгэ охсубут уонна саха быһаҕынан хаҥас сарын лаппаакытыгар анньыбыт.

Иккис дьахтар эрэйдээх дьүөгэтин көмүскэспитигэр, аны кинини тимир сыабынан харахха охсубут уонна иккитэ быһаҕынан искэ анньыбыт.

Дьиибэтэ диэн, дьахталлар бу эчэйиилэрин эксперт «чэпчэкилэр» диэн быһаарыы таһаарбыт.

Маны таһынан, бу киһийдэх муус устарга билэр киһитин дьиэтигэр бииргэ арыгылаан баран, дьахтар нуорка саҕынньаҕын уонна бэргэһэтин уоран тахсыбыт.

Суут мунньаҕар рецидивист буруйун сороҕун эрэ билиммит: уоруу чааһыгар — «клептомания ыарыылаахпын» диэбит, оттон дьахталлары эчэтиитин ончу билиммэтэх, «ити буруйдары холуобунай-процессуальнай сокуону кэһэн туран билиннэрбиттэрэ» диэн куотуна сатаабыт.

Аны туран, бу ыар буруйдары кини холуонньаттан болдьоҕун иннинэ босхолонон (УДО-нан) тахсыбыт кэмигэр оҥорбут. Онто учуоттанан, эбиллэн, суут кинини 2 сыл 3 ыйга кытаанах эрэсиимнээх холуонньаҕа көҥүлүн быһарга уурбут.

Бириигэбэр сокуоннай күүһүгэр киирэ илик, өрүттэр Үрдүкү суукка ааһыныахтарын сөп диэн СӨ Борокуратууратын пресс-сулууспата иһитиннэрдэ.

Вера МАКАРОВА, «Саха сирэ» хаһыат, edersaas.ru

Хаартыска: интернеттэн.  

+1
0
+1
0
+1
0
+1
0
+1
0
+1
0
+1
0