Национальнай бырайыактары олоххо киллэриигэ СӨ Дьахталлар уопсастыбаннай сойуустара анал былааннаахтык үлэлэһэр.
«Демография», «Үөэхтээһин, «Доруобуйа харыстабыла», «Култуура» уонна «Экология» бырайыактарга сүрүннээн дьахтар-аймах кыттыыта улахан оруоллааҕын учуоттаан, дьахталлар уопсастыбаннай сойуустара бу хайысхаларга улуустарынан үгүс үлэни ыытар.
Бүгүн уопсастыбаннай тэрилтэ тэрийиитинэн улуустартан кэлбит баһылыктары социальнай бэлиитикэҕэ солбуйааччылар, дьахталлар сэбиэттэрин бэрэссэдээтэллэрэ уонна уопсастыбаннай түмсүүлэр бэрэстэбиитэллэрэ тустаах национальнай бырайыактары олоххо киллэрсэр министиэристибэлэр уонна биэдэмистибэлэр салайааччыларын кытта «төгүрүк остуол» ыыттылар. Пленум бу маннык хайысхалаахтык ыытыллыбыта киэҥ ыҥырыылаах мунньах кыттааччыларын барыларын сэргэхситтэ диэххэ сөп. Ол курдук, «ыйытыы-эппиэт» көрүҥүнэн ыытыллыбыт кэпсэтии олох араас өрүттэрин таарыйда.
Ордук хоту улуустар бэрэстэбиитэллэрэ интэриэһиргиир боппуруостара үгүс. Буолумуна, киин куоракка сыл баһыгар биирдэ-иккитэ кэлэн барар буолан, иитиэхтии сылдьар санаалара үгүс буоллаҕа. Ол курдук, Орто Халыма улууһун дьаһалтатын баһылыгын солбуйааччы Анна Попова бу соторутааҕыта өрөспүүбүлүкэ икки улууһугар бэлиэтэммит хомолтолоох түбэлтэлэри холобурдаан туран, интэриэһиргээн ыйытта:
—Араас уустук балаһыанньа тахсар түбэлтэтэ улуус аайы баар. Бу маннык түгэҥҥэ биһиги оҕону бастаан утаа ханна тиэрдиэхтээхпитий?
Онуоха Үлэ уонна социальнай көмүскэл миниистирэ Елена Волкова, бастатан туран, балыыһаҕа илдьэн, оҕо ис туругун бэрэбиэркэлэтэр наадатын ыйда. Манна дакаастабылы бигэргэтэр аан бастакы докумуон толоруллуохтаах эбит.
— Онтон боппуруос быһаарыллыар диэри оҕону «приемнай» дьиэ кэргэттэргэ олордор ордук, — диэн бэлиэтээтэ миниистир.
Муома улууһун бэрэстэбиитэлэ, «Саха сирин Арктиката» диэн региональнай уопсастыбаннай тэрилтэ толорооччу дириэктэрэ Владилена Абрамова үгүстүк сүүрбүт-көппүт боппуруоһун быһаартараары үөрэх миниистирин 1-кы солбуйааччыта Михаил Присяжнайга боппуруоһун туһаайда:
— Миэхэ Арктика улуустарыттан уонна бу маннык статуһа суох хоту улуустар устудьуоннара, төрөппүттэр, чугас аймахтар университет уопсайдарыгар миэстэ биэрбэттэр диэн күн бүгүнүгэр диэри туруорсаллар. Өссө сэбиэскэй кэмтэн ыла хоту улуустартан кэлбит оҕолор уочарата суох быһа уопсайынан хааччыллаллар этэ. Билигин киин улуус буоллун, Арктика улууһа буоллун, «иногородние» диэн статустанар буолбуттар. Бу тоҕо манныгый? Ким быһаарар боппуруоһай?
Миниистир солбуйааччыта Михаил Присяжнай хоту улуус бэрэстэбиитэлигэр:
— Билигин устудьуону уопсайынан хааччыйыыга үөрэх тэрилтэтин салалтата кими уопсайынан хаачыйарын-хаачыйбатын бэйэтин быһаарыытыгар бэриллибитэ. Онон бу боппуруоһу кыһалҕалаах киһи оҕото үөрэнэр факультетын салалтатын кытта быһаарсара ордук, — диэн хоруйу биэрдэ.
Ити курдук, СӨ Дьахталлар уопсастыбаннай сойуустара тэрийбит пленумугар уопсастыбанньык дьахталлар бэйэлэрин санааларын хото этиннилэр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.