Бу күннэргэ Москваҕа Арассыыйа дьахталларын сойууһа дьахталлар гражданскай көҕүлээһини үрдэтиигэ туһуламмыт тэрээһини ыытта.
edersaas.ru
Дьахталларга гражданскай көҕүлээһин оскуолатыгар Саха сирин дьахталларын уопсастыбаннай сойууһуттан «Arctic Lady» уопсастыбаннай пуонда салайааччытын солбуйааччы Туяна Андреева кыттыыны ылла.
— Суолталаах тэрээһиҥҥэ дойду 39 регионуттан 44 уопсастыбанньык дьахтар кыттыыны ылла. Дьахталлар сэбиэттэрин, уопсастыбаннай түмсүүлэрин үлэлэрин көҕүлүүр инниттэн дойду сайдыытыгар туһуламмыт национальнай бырайыактары олоххо киллэриигэ стратегическай хайысхалаах соруктары толорууга туһуламмыт аһаҕас кэпсэтии былаһааккатыгар кыттыыны ыллым. Манна граннары суруйуу, араас сонун сүүрээннэри тобулуу туһунан Арассыыйа дьахталларын регионнааҕы сойуустарыттан уопсастыбаннай үлэҕэ буспут-хаппыт уопуттаах салайааччылар санааларын үллэһиннилэр.
Мин, Саха сирин бэрэстэбиитэлэ, өрөспүүбүлүкэҕэ национальнай бырайыактары олоххо киллэриигэ дьахталлар уопсастыбаннай тэрилтэлэрин оруолларын туһунан кэпсээтим. Уонна «Дьахтар ситиһиитин кистэлэҥэ» диэн бэйэм ааптарскай бырайыакпын билиһиннэрэн туран, дьахталлары араас сонун ис хоһоонноох тэрээһиннэри тэрийэн көҕүлүөххэ сөптөөҕүн холобурдаатым, — диэн санаатын үллэстэр Саха сирин дьахталларын уопсастыбаннай тэрилтэлэрин сойууһун аатыттан кыттыбыт Туяна Андреева.
Арассыыйа дьахталларын сойууһун бэрэссэдээтэлэ Екатерина Лахова дьахталлар гражданскай актыыбынастарын үрдэтиигэ туһуламмыт тэрээһин кыттыылаахтарыгар национальнай бырайыактары олоххо киллэриигэ уопсастыбанньык дьахталлары үөрэтии оскуолатыгар сылдьыбыттарын туһунан анал докумуоннары туттарда.
Елена ПОТОЦКАЯ, «Саха сирэ» хаһыат, edersaas.ru
Хаартыска Туяна Андреева дьиэтээҕи архыыбыттан.