Саха Өрөспүүбүлүкэтигэр Сомоҕолоһуу сылынан, кулун тутар 15 күнүгэр Мэҥэ Хаҥалас улууһун Дьабыыл нэһилиэгэ Дьокуускай куоракка нэһилиэк күнүн үрдүк таһымҥа тэрийдэ, бар дьонун түмтэ.
edersaas.ru
«Дьабыыл түмсүүтүн» көҕүлээһининэн, көрсүһүү бастакы чааһа бырабыыталыстыба дьиэтигэр биир дойдулаахтарбытын кытта «Нэһилиэкпит сайдыытын сүрүн хайысхалара» диэн «төгүрүк остуол» буолла. Манна муһуннулар Дьабыылтан төрүттээх киэн тутта ааттыыр дьоммут: меценат, СӨ Бочуоттаах олохтооҕо, СССР прокуратуратын бочуоттаах үлэһитэ Н.Ф. Борисов–Ньукулай Уус, Ил Дархан дьаһалтатын салайааччы Ф.М. Борисов, РФ Суруналыыстарын сойууһун чилиэнэ И.Л. Турантаев, Ил Түмэн депутаттара А.И. Еремеев, И.И. Данилов, «Дьабыыл тумсүүтүн» салайааччы М.И. Варламов, Мэҥэ Хаҥалас улууһун «Дойду ситимэ» түмсүү чилиэнэ А.В. Пермякова, Нөмүгүтээҕи килиэби оҥорор собуот генеральнай дириэктэрэ В.А. Нестеров, доруобуйа харыстабылын министиэристибэтин кылаабынай терапевт-бырааһа М.А. Слепцова, «Новокон» ХЭТ генеральнай дириэктэрэ Н.Н. Иванов, урбаанньыт Т.К. Лазарева, Н.И. Иванова, СӨ үтүөлээх тутааччыта В.Г. Калачев, урбаанньыт, бокса федерациятын вице-президенэ Г.Р. Ябловскай, РФ уонна СӨ үтүөлээх артыыската К.А. Иванова, «Кэскил» наркологическай кабинет дириэктэрэ М.А. Баишев, Мэҥэ Хаҥалас улууһун Бочуоттаах олохтооҕо С.И. Сергеев уонна нэһилиэкпит тэрилтэлэрин, уопсастыбаннай түмсүүлэрин салайааччылара кыттыыны ыллылар.
«Төгүрүк остуолу» Дьабыыл баһылыга Сергей Иннокентьевич Сергучев ыытта, нэһилиэк пааспарыттан саҕалаан, 2018 сыллаах үлэ түмүктэрин, ситиһиилэрин, ханнык хайысханан үлэлэр баралларын билиһиннэрдэ. Бу сылга үбүлүөйдээх бэлиэтээһиннэри сырдатта. Сэргэх, кэскиллээх, аһаҕас кэпсэтии буолла.
Салгыы көрсүһүү иккис чааһа Оҕо дыбарыаһыгар буолла. Ыалдьыттары алаадьынан, саламаатынан уонна быырпаҕынан айах тутан күндүлээн көрүстүбүт. Норуот маастардара Т.Г. Дягтярева, П.Н. Васильева, талааннаах тарбахтаах иистэнньэҥнэр М.Н. Копырина, Т.С. Петрова, М.А. Свешникова, В.Н. Свешникова, М.Г. Аммосова, Л.И. Борисова, В.А. Петрова, Н.А. Захарова, В.И. Березкина быыстапкалара саалаҕа тардыллан турда, дьон биһирэбилин ылла, маны таһынан «Хоту» СХПХ бэйэтин сибиэһэй бородууксуйатын аҕалан атыылаата.
Манна Дьабыылтан төрүттээх артыыстарбытын кытта кэнсиэр буолла. СӨ народнай артыыһа Юрий Баишев, Сергей Зверев-Кыыл уолун аатынан Үҥкүү театрын артыыската, хомусчут Василена Шарина, Судаарыстыбаннай филармония хорун солиһа Николай Шарин, Эстрада театрын артыыһа, фокусник күтүөппүт Алексей Голдьеров, эдэр ырыаһыттар Ян Березкин, Люба Жиркова, СӨ култууратын үтүөлээх артыыската Надежда Николаевна Константинова салайааччылаах «Надежда» үҥкүү спортивнай кулуубун кэскиллээх үҥкүүһүттэрэ Алина Березкина, Ксюша, Роман Заостровскайдар, Валентина Баягантаева салайааччылаах Дьокуускай куорат 7-с нүөмэрдээх оскуолатын «Ситимчээн» үҥкүү бөлөҕө уонна нэһилиэкпит «Нуоралдьыма» үҥкүү ансаамбыла, «Сиккиэр» вокальнай ансаамбыл, «Өркөн» эр дьон ырыа ансаамбыллара, «Аартык» ыччаттар түмсүүлэрин үҥкүүтэ, хор, Екатерина Стручкова, Любовь Самойлова дуэттара, эдэр кэскиллээх оһуохайдьыт Денис Оконешников сүрдээх үчүгэй, киһи сүргэтин көтөҕөр кэнсиэрин бэлэхтээтилэр. Сааланы биир гына мустубут дьон ытыстарын тыаһа ньиргийэн олордо.
Бу күн биир дойдулаахтарбыт төрөөбүт дойдуларын дьонун-сэргэтин көрсөн, кэпсэтэн, ахтылҕыннарын таһааран, үөрүүлэрэ муҥура суох. Хаартыскаҕа түһүү үгэнэ буолла, кылаастар, доҕоттор, аймахтар диэн көрсүһэр умнуллубат түгэн үүннэ.
Нэһилиэкпит күнэ бэрт чаҕылхайдык, үөрүү, ситиһии аргыстаах буолан ааста, дьону түмтэ, Дьабыылбыт сайдарын туһугар үлэ, былаан торумнанна.
Н.С. Киренская, edersaas.ru саайтка анаан