Уус Маайа улууһун Элдьикээн уонна Томпо улууһун Дьабарыкы Хайа олохтоохторо, уопсайа икки тыһыынча кэриҥэ киһи, аан бастакытын түргэн сырыылаах интэриниэккэ холбоннулар. Бу туһунан МегаФон хампаанньа пресс-сулууспата иһитиннэрдэ.
Бу икки бөһүөлэк Алдан өрүс кытылыгар тураллар. Өрөспүүбүлүкэ киин куоратыттан 400-кэ км тэйиччи сыталлар.
LTE ситими бу бөһүөлэктэр курдук ыраах сытар нэһилиэнньэлээх пууннарга бастакытынан киллэрбит операторынан МегаФон хампаанньа буолар. Туһааннаах бөһүөлэктэр өрөспүүбүлүкэ экономикатын сайдыытыгар төһүү күүһүнэн буолаллар. Алдан өрүскэ турар Элдьикээн бөһүөлэгэ 1941 сыллаахха төрүттэммитэ. Билигин бөһүөлэк кыһыл көмүһү хостуур промышленнай оройуон сүрүн базатыгар кубулуйда. Оттон таас чохтооҕунан биллэр Дьабарыкы Хайа Элдьикээнтэн 164 км сиргэ сытар.
«Цифровой тэҥэ суох буолууну суох гынарга, ыраах сытар нэһилиэнньэлээх пууннары мобильнай интэриниэтинэн хааччыйыы соруга турар. Күн бүгүн МегаФон 4G түргэн ситиминэн Саха сирин 76% нэһилиэнньэтин хааччыйан олорор», — диэн хампаанньа Саха сиринээҕи салаатын дириэктэрэ Мария Мамедова иһитиннэрдэ.
edersaas.ru